Mádenıet jáne sport mınıstri Ashat Oralov Halyqaralyq shahmat federasııasynyń (FIDE) prezıdenti Arkadıı Dvorkovıch bastaǵan delegasııamen kezdesti, dep habarlaıdy Egemen.kz.
Taraptar birneshe mańyzdy máselelerdi, sonyń ishinde bıyl kóktemde Astanada ótetin shahmattan álem chempıonatyn uıymdastyrý máselelerin talqylady.
«FIDE-niń bizdiń eldi tańdaýynyń bir sebebi bar ekenin atap ótkim keledi. Qazaqstan shahmattan eń tamasha kezeńdi bastan keshýde. Memleket basshysy Qasym-Jomart Toqaev elimizdegi shahmat qozǵalysynyń damýyn jeke baqylaýynda ustap otyr. 2022 jyly respýblıka boıynsha 7 618 seksııada 253 myńnan astam adam shahmatpen júıeli túrde shuǵyldandy. Oqý jylynyń basynan beri «Shahmat» páni tańdaý páni retinde 28 myńǵa jýyq balaǵa arnalǵan 654 mektepte engizildi», dep jazdy Ashat Oralov Facebook paraqshasynda.
Mınıstr atap ótkendeı, jas shahmatshylarǵa úlgi bolatyn sportshylar bar. Dınara Sádýaqasova, Jansaıa Ábdimálik, Bıbisara Asaýbaeva jáne basqa da shahmatshylar tarıhta óz esimderin qaldyrdy.
«Kúzde Qazaqstan Respýblıkasynyń Prezıdenti FIDE basshysymen kezdesip, bizdiń el men Halyqaralyq shahmat federasııasy arasyndaǵy yntymaqtastyqtyń keleshegin talqylady. Bul baǵyttaǵy jumystar jalǵasa beredi», delingen jazbada.