Túrkııanyń Gazıantep qalasynda bolǵan joıqyn jer silkinisiniń saldaryn joıýǵa jumyldyrylǵan qazaqstandyq qutqarýshylardyń birinshi eshelony elge aman-esen oraldy, dep habarlaıdy Egemen.kz TJM baspasóz qyzmetine silteme jasap.
QR TJM qutqarýshylary men Apattar medısınasy ortalyǵynyń dárigerleri mingen ushaq Almaty áýejaıyna qondy. Olardy týystary, dostary men áriptesteri kútip aldy.
Memleket basshysynyń tapsyrmasy boıynsha 7 aqpanda qutqarý bólimsheleriniń kúshteri men quraldary, onyń ishinde Qazaqstan TJM tehnıkasy, Apattar medısınasy ortalyǵynyń dárigerleri jáne kınologııalyq eseptoptar alǵashqylardyń biri bolyp eki eshelonmen jolǵa shyǵyp, eń kúrdeli obektilerde izdestirý-qutqarý jumystaryn júrgizýge kirisken edi. Qazaqstandyq qutqarýshylar tobyn TJ birinshi vıse-mınıstri Ibragım Kúlshimbaev basqardy.
Túrkııanyń úsh óńirinde izdestirý-qutqarý jumystaryn júrgizý bastalǵannan beri Qazaqstan TJM qutqarýshylarynyń kúshteri 7 adamdy qutqardy. Qaza tapqan 88 adamnyń, onyń ishinde 10 balanyń denesi shyǵaryldy.
«Qutqarýshylar qolmen, sondaı-aq ınjenerlik tehnıkany, avarııalyq-qutqarý jabdyqtaryn, shans aspaptaryn tarta otyryp, 250 myńnan tekshe astam metr úıindilerdi bólshektedi. Tolyǵymen qıraǵan ǵımaratta qazaqstandyq qutqarýshylar adamdardyń ornalasqan jeri men jaı-kúıin anyqtaý, úıindiler astynda zardap shekkendermen aýdıo baılanys ornatý, qajetti kómektiń kólemi men sıpatyn anyqtaý boıynsha jumystaryn júrgizdi. Qazaqstandyq qutqarýshylardyń úlken tereńdiktegi úıindilerdiń astynan zardap shekkenderdi evakýasııalaý úshin jol ashý jumystaryn oryndap, jedel jáne saýatty is-qımyldyń, sondaı-aq zardap shekkenderdi bloktan shyǵarý boıynsha ýaqtyly qabyldanǵan sharalardyń nátıjesinde múmkindik týdy. Qutqarýshylar qulaǵan qurylys materıaly men úı jıhazynyń qaldyqtary, tar sańylaýlar arqyly joldy kesip ótti. Qutqarýshylardyń mundaı jumysy óte qaýipti jáne joǵary kásibılikti, qyraǵylyq pen jedeldikti talap etedi», delingen habarlamada.
Qazaqstan TJM Apattar medısınasy ortalyǵynyń dárigerleri de táýlik boıy zardap shekkenderge bilikti medısınalyq kómek kórsetti. Barlyq jumys kezeńinde 200-ge jýyq jergilikti turǵyn men qutqarýshylarǵa, onyń ishinde 30-ǵa jýyq balaǵa medısınalyq kómek kórsetildi. Jergilikti turǵyndarda stresstiń jedel reaksııasymen, gıpotermııamen, tynys alý organdarynyń aýrýlarymen, sondaı-aq ártúrli jaraqattarmen baılanysty aýrýlar basym boldy. Pnevmokarkas modýline negizdelgen medısınalyq post izdeý nátıjelerin kútken zardap shekkenderdiń týystary úshin baspana boldy. Bul modýl qıraǵan ǵımarattardyń arasynda qalǵan adamdar úshin jylytý pýnkti retinde de paıdalanyldy.
«Bizdiń kınologııalyq eseptoptarymyz izdeý-qutqarý jumystarynda da tamasha nátıjeler kórsetti jáne úıindiler astyndaǵy adamdardy izdeý kezinde ózderiniń joǵary biliktiligin rastady. Qutqarýshy ıtter-belgııalyq malınýa Djeıkob, lıga M Sırıýs jáne Aksel, Labrador Charlı Kıng, nemis ovcharkasy Mırta, Grınpıs esimdi border kollı-nusqaýshylarmen jáne qutqarýshylar jasaqtarymen birge ár adamnyń ómiri úshin birneshe kún boıy qıraǵan nysandarda jumys istedi», delingen TJM habarlamasynda.
Eske sala ketsek, Memleket basshysynyń tapsyrmasy boıynsha Túrkııaǵa gýmanıtarlyq kómek te jiberildi. Tabıǵı apat aımaǵyna zardap shekkenderge kómek kórsetýge arnalǵan shatyrlar, jylytý qurylǵylary, jyly kıimder jáne basqa da qajetti zattar jiberildi. Gýmanıtarlyq kómektiń jalpy kólemi 55 tonnany qurady.