24-26 aqpan aralyǵynda elordalyq ál-Farabı atyndaǵy Oqýshylar saraıynda robot-tehnıkadan Ortalyq Azııa oıyndary ótedi, dep habarlaıdy Egemen.kz Astana ákimdiginiń resmı saıtyna silteme jasap.
Chempıonat úsh jas sanatynda ótedi: 6-10 jas aralyǵyndaǵy balalarǵa arnalǵan First LEGO League Explore, 10-16 jas aralyǵyndaǵy FIRST Lego League Challenge jáne 12-18 jas aralyǵyndaǵy FIRST Tech Challenge. Jeńimpazdar halyqaralyq kezeńde Amerıkanyń Hıýston qalasyna el namysyn qorǵaýǵa attanady.
«Bıylǵy maýsym energııanyń ózekti taqyrybyna arnalǵan. FIRST jarystarynyń biregeıligi robottardy baǵdarlamalaý men qurastyrýdan bólek balalar ınnovasııalyq jobasymen jumys istep, óz qaýymdastyǵynyń ózekti máselelerine ınjenerlik sheshimder jasap jatyr», dep atap ótti Ustem Robotics qorynyń basshysy Asylbek Myrzahmetov.
Oıyn uıymdastyrýshylarynyń aıtýynsha, ótken jyldyń sońynan bastap ár komanda #FIRSTKZ2023 heshtegimen áleýmettik jelilerde kóptegen tapsyrmalardy oryndady, sonyń ishinde balalar ártúrli energetıkalyq stansııalardan naqty reportajdarmen jumys istedi, sarapshylardan suhbat aldy, oqý oryndarynda prezentasııalar men sheberlik synyptaryn ótkizdi. Oqýshylar jarysqa daıyndyq aıasynda joǵary oqý oryndarynyń stýdentterimen óz tájirıbelerimen bólisti.
Jyl saıyn robototehnıkamen aınalysatyn balalardyń sany artyp keledi. Osy baǵyttaǵy barlyq taraptardyń úılesimdi jumysynyń nátıjesinde 2022 jyldyń qazan aıynda Qazaqstan oqýshylary Jenevadaǵy robototehnıka boıynsha first GLOBAL CHALLENGE Búkilálemdik jarystarynda jeńiske jetti. Keıinirek qazaqstandyq oqýshylar alǵash ret Dortmýndtaǵy robot-tehnıka boıynsha halyqaralyq olımpıadada ekinshi orynǵa ıe boldy.
FIRST Robotics Dúnıejúzilik qozǵalysynyń irikteý matchtary Astana, Almaty, Shymkent jáne Oral qalalarynda ótti. Olarǵa 2 myńnan astam oqýshy qatysty. Sońǵy 3 jylda Qazaqstanda 3 myńnan astam robot-tehnıka kabıneti ashyldy. Eki myńnan astam muǵalim robot-tehnıka kýrstarynan ótti.
Ortalyq Azııa chempıonaty úsh kúnge sozylady. Oıyndardyń resmı jabylýy 26 aqpanda ótedi.