Prezıdent Qasym-Jomart Toqaev 2025 jylǵa deıin respýblıkalyq mádenıet jáne arhıv isi uıymdary qyzmetkerleriniń eńbekaqysyn 100%-ǵa kóterý týraly tapsyrmasy aıasynda bıyl 1 qańtardan sala mamandarynyń aılyǵy orta eseppen taǵy 22%-ǵa artty, dep habarlaıdy Egemen.kz Mádenıet jáne sport mınıstrligi baspasóz qyzmetine silteme jasap.
Sońǵy eki jylda 64 myńǵa jýyq mádenıet jáne arhıv isi qyzmetkerleriniń eńbekaqysy orta eseppen 45%-ǵa kóterildi.
«2023 jyldyń qańtarynan barlyq sanattaǵy qyzmetkerlerdiń aılyǵy óskenin atap ótý kerek. Bul basshylar men jetekshiler, negizgi personalmen qatar, eden jýýshy, kúzetshi, vahter sekildi jumyskerlerdiń de eńbekaqysy kóterildi», dedi Mádenıet jáne sport vıse-mınıstri N. Dáýeshov.
Mádenıet jáne sport mınıstrligi sala mamandarynyń aılyǵyn odan ári ulǵaıtýǵa bastamashy bolady. Máselen, shyǵarmashylyq joǵary oqý oryndaryndaǵy konsertmeısterlerdiń eńbekaqysyn kóterý josparda bar. Ol úshin zańnamalyq aktilerge tıisti ózgerister engizý boıynsha belsendi jumys júrip jatyr. Sondaı-aq «Ulttyq» mártebesi bar mádenıet uıymdary qyzmetkerleriniń eńbekaqysy eki esege jýyq ósti. Búginde elimizde osy sanatqa jatatyn 5 uıym bar. Mınıstrlik aldaǵy ýaqytta atalǵan nysandardyń tizimin keńeıtýdi josparlap otyr.