Úkimet basshysy 1 sáýirge qaraı alǵashqy kómek kórsetý obektilerin salý boıynsha jobalaý-smetalyq qujattamany ázirleýdi aıaqtaý, 1 mamyrǵa deıin kópbeıindi aýdandyq aýrýhanalardy kúrdeli jóndeý jáne qaıta jańartý úshin qujattamany ázirleý qajettigin aıtty, dep habarlaıdy Egemen.kz.
«Aýyldaǵy medısınalyq kómektiń sapasyn arttyrý maqsatynda «Aýyldyq densaýlyq saqtaýdy jańǵyrtý» ulttyq jobasyń aıasynda óńirlerde 655 alǵashqy medısınalyq-sanıtarlyq kómek nysanyn, onyń ishinde 253 medısınalyq pýnkt, 242 feldsherlik-akýsherlik pýnkt jáne 160 dárigerlik ambýlatorııa salý kózdelip otyr. 32 kópbeıindi ortalyq aýdandyq aýrýhanany (2024 jyly – 7, 2025 jyly – 25) jańǵyrtý josparlanyp otyr. Onda ınsýlt ortalyqtary, kardıologııa, jansaqtaý jáne ońaltý bólimsheleri ashylyp, olar KT, MRT, ÝDZ, О́JJ apparattarymen jaraqtandyrylmaq», dedi Densaýlyq saqtaý mınıstri Ajar Ǵınaıat.
Sonymen qatar ol aýyldyq densaýlyq saqtaý obektileri úshin 1 100 medısına qyzmetkerin daıarlaý júzege asyrylatynyn aıtty.
Premer-mınıstr bıyl qurylysy bastalatyn medısınalyq nysandardyń barlyǵyna derlik jer bólingenin atap ótti. Tek Ulytaý oblysynda ǵana atalǵan jumystar jalǵasýda.
«Ákimdik jer ýchaskesin bólý jumystaryn bir apta ishinde aıaqtaýy tıis», dedi Álıhan Smaıylov.
Álıhan Smaıylovtyń aıtýynsha, jańa medısınalyq nysandardy kadrlarmen qamtamasyz etýdi aldyn ala qarastyryp, olarǵa áleýmettik qoldaý sharalarynyń tolyq paketin usyný qajet.
«Taǵy da atap ótemin, Ulttyq jobany iske asyrýdyń árbir kezeńin jobalyq basqarý júıesi sheńberinde turaqty baqylaýǵa alamyz», dedi Úkimet basshysy.