Qazaqstandyq aralas jekpe-jek faıteri, bul sport túrinen birde-bir jeńilis tappaǵan sportshy Shavkat Rahmonov Qobda aýdanynyń Qobda aýylynda bolyp, sý tasqynynan zardap shekken turǵyndarmen kezdesti, dep habarlaıdy Egemen.kz Aqtóbe oblysynyń resmı saıtyna silteme jasap.
Júregi «qazaq» dep soǵatyn sportshy qobdalyqtardy Naýryz meıramymen quttyqtady. Qıyn kezeńdi bastan ótkergen halyqpen árdaıym birge ekenin aıtty. Qoldaý retinde bir otbasyǵa úı salyp beretinin qýanyshpen jetkizdi.
«Naýryz meıramymen barshańyzdy quttyqtaımyn. Keremet kúnde 24 úıdiń qazyǵy qaǵylyp jatyr. Men de bul bastamaǵa óz úlesimdi qosamyn dep sheshtim. «Apat aıtyp kelmeıdi» deıdi. Synaqtarǵa moıymaı, jeńe bildińizder. Sizderge densaýlyq, baqyt tileımin. Tek alǵa!», dedi Shavkat Rahmonov.