«Býrabaı» memlekettik ulttyq tabıǵı parkiniń ınspektorlary Shýche-Býrabaı kýrorttyq aımaǵyndaǵy kólderdiń betindegi muzdy tazalap, 3 tonnadan astam qoqys jınady, dep habarlaıdy Egemen.kz.
«Taza muz» aksııasy aıasynda ulttyq park qyzmetkerleri balyqshylar men týrıster qaldyrǵan qoqys kún jylyǵan kezde sýǵa túspeýi úshin kól betindegi muzdy tazalap, demalýshylarǵa profılaktıkalyq áńgime júrgizedi.
Býrabaı, Shýche jáne Kishi Shabaqty kólderiniń betindegi muzaıdyndy tazartý aksııasy sońǵy ret bıyl 24 naýryzda ótip, oǵan Býrabaı, Aqylbaı, Barmashy orman sharýashylyqtarynyń 45 ınspektory men jergilikti áýesqoı balyqshylar qatysty. 35 kg-nan astam qoqys jınaldy.
– Ulttyq saıabaq kólderiniń ıhtıofaýnasy bıyl qysty qalypty ótkizdi. Júkeı men Qotyrkólden basqa kólderde erigen ottegi deńgeıi tómendep, aerasııa sharalary júrgizildi. Ulttyq parktiń ınspektorlary sýdy ottegimen qanyqtyrý úshin 12 ret oıyq oıdy. Qazir jaǵdaı turaqty. Kóktem jaqyn qalǵandyqtan, ınspektorlar balyq ýyldyryq shashatyn, sýda júzetin jáne sý mańyn mekendeıtin qustardyń uıa salatyn jerlerin qorǵaýǵa kóńil bóle bastady. «Taza muz» aksııasyn ótkizý dástúrge aınalǵan, oǵan ulttyq park qyzmetkerlerimen qatar, jergilikti áýesqoı balyqshylar, demalýshylar, jergilikti turǵyndar atsalysady. Barshańyzdy osylaı qorshaǵan ortany tazalaýǵa shaqyramyz! – deıdi ınjener ıhtıolog Maksım Pak.
«Býrabaı» ulttyq parki ujymy 23 kóldiń ekologııasyn baqylaıtynyn aıta keteıik. Olardyń ishindegi eń iri beseýi – Shýche, Býrabaı, Úlken jáne Kishi Shabaqty, Qotyrkól kólderiniń muz jamylǵysynyń aýdany 10,5 myń gektardan asady.