Sý dobynan Sıngapýrda uıymdastyrylǵan álem kýboginiń irikteý kezeńine arnalǵan Azııa chempıonaty óz máresine jetti. Sary qurlyq dodasynda baq synaǵan Qazaqstannyń erler quramasy qola júldege ıe boldy.
Sportty damytý dıreksııasynyń málimeti boıynsha Damır Temirhanov jattyqtyratyn Qazaqstan erler quramasy Azııa chempıonatynyń alǵashqy týrynda Fılıppınnen basym tússe (19:6), keıingi matchta Gonkong quramasyn oısyrata jeńdi – 22:7. Al fınalǵa joldama beretin matchta Iranmen kezdesip, penaltı serııasynda qarsylastaryna ese jiberdi. Qorytyndy esep – 14:15. Degenmen qola júlde úshin ótken básekede jerlesterimiz Taıland vaterpolshylaryn 18:7 esebimen jeńip, Azııa birinshiliginiń qola júldesimen birge Álem kýbogi kezeńiniń joldamasyn jeńip aldy.
Al qyzdar arasyndaǵy jarysta Ásel Jaqaeva baptaıtyn Qazaqstan áıelder quramasy chempıon atanǵan bolatyn. Olar barlyq matchta qarsylastarynan basym tústi. Osylaısha, sý dobynan Qazaqstannyń erler men áıelder quramasy mamyr aıynda Germanııanyń bas shahary – Berlınde jalaýy jelbireıtin Əlem kýbogine qatysatyn boldy.