Qaraǵandylyq oqýshylar júreginde aqaýy bar jandardy emdeýge arnalǵan tyń joba jasap shyǵardy. Joba avtorlary – Nazarbaev zııatkerlik mektebiniń 9-synyp oqýshylary Aldııar Naqyp pen Alpamys Isabekov.
Oqýshylardyń «Implanttalatyn kardıostımýlıasııa jáne defıbrıllıasııa júıesi» atty jobasy Astanada ótken baıqaýda I oryndy jeńip aldy. Jobany sátti qorǵaǵan Aldııarǵa Qazaqstan-Brıtan tehnıkalyq ýnıversıtetiniń granty buıyrdy. Onyń aıtýynsha, qurylǵy aýrýdyń túrin birden anyqtaıdy. Sodan soń júrekke soǵan oraı elektr ımpýlsin jiberedi. Ol ımpýlster júrekke kúsh bermek.
– Bizdiń qurylǵy teri astyna bekitilip, al elektrodtar júrekke qan tamyrlary arqyly ornatylady. Qurylǵy aýrýdyń túrin dereý anyqtap, elektr ımpýlsterin jiberedi. Bul ımpýlster júrek bulshyq etterine onyń jumysyn tejep ne jedeldetý arqyly áser etedi, – deıdi ol.
Mundaı kardıostımýlıasııa jáne defıbrıllıasııa júıesi júrektiń tahıkardııa, bradıkardııa, júrek qarynshasynyń fıbrıllıasııasyn emdeýge kómektesedi eken.
Bıomedısına, ınjenerııa jáne tehnologııa baıqaýyna alty seksııa boıynsha 100-ge jýyq joba qatysqan. Sonyń arasynda qaraǵandylyq oqýshylardyń taǵy bir jobasy – «Aqyldy» protezder jáne olardyń elementteri. Ekzo jáne endoprotezdeý» úzdik dep tanyldy. Sonymen qatar Qaraǵandydaǵy NIS oqýshysy Ulan Mustafın «Adam aǵzasynyń fýnksıonaldyq jaı-kúıin monıtorıngileýge arnalǵan apparattyq-baǵdarlamalyq quraldar» seksııasynda úshinshi oryn ıelendi.
Jalpy, bul baıqaýǵa qaraǵandylyq bilimpazdar bes joba usynǵan eken. Onyń arasynda «Aıaq-qoldary ártúrli adamdarǵa arnalǵan robottalǵan taban», «Sińdirý ádisimen biriktirilgen dárilik gıdrogel», «Búkirlikpen kúresýge arnalǵan Postrue qurylǵysy jáne mobıldi qosymsha» jobalary da bar.
QARAǴANDY