2022 jyldyń qorytyndysy boıynsha, bir adamǵa shaqqandaǵy turǵyn úımen qamtylý kórsetkishi 23,4 sharshy metrdi quraǵan. BUU-nyń áleýmettik standarttaryna sáıkes bul kórsetkish 30 sharshy metrden asýy tıis. Bizdiń eldegi baspana alýdyń biregeı joly – ıpoteka jáne bul zańdylyqtyń jaqyn arada ózgere qoıýy ekitalaı.
Degenmen bizdegi kommersııalyq ıpoteka aıtarlyqtaı qymbat bolyp shyqty. Mysaly, qalypty ıpotekany, ıaǵnı bankterdiń seriktes baǵdarlamalary men jeńildetilgen memlekettik baǵdarlamalaryna kirmeıtin jáne turǵyn úı qurylys jınaq júıesine jatpaıtyn ıpotekalyq nesıe berýmen bizde 12 ekinshi deńgeıli bank aınalysady. Bul segmenttegi eń tómengi JTSM 14,9%-dan («SentrKredıt banki») 26,5%-ǵa (Qazaqstandaǵy Qytaı Banki) deıin aýytqıdy. Bul mólsherlemelerdiń joǵarylyǵy sonsha, atalǵan tásilmen úı alatyn qazaqstandyqtar tym az.
Sonymen qatar keıbir bankter óz ónimderin jetildirip, seriktes baǵdarlamalar ázirleıdi. Qazir eldegi 4 bank qurylys kompanııalarymen seriktes ıpoteka usynyp otyr.
«Bul segmenttegi eń tómengi mólsherlemeni Altyn Bank eki mınýtta maquldaıtyn sıfrlyq ıpotekanyń bóligi retinde BI Group-pen birlesken «Ońaı» baǵdarlamasyn usynady: nesıe merzimine baılanysty JTSM 0,1%-dan bastalady. Sonymen qatar bank naýryz aıy boıy aksııa ótkizip, mólsherlemeni 4,5%-ǵa tómendetedi. Odan keıin BI Group-pen birlesken ıpotekalyq baǵdarlama usynatyn, JTSM 0,2%-dan bastalatyn «Frıdom Fınans Bank» tur. «SentrKredıt bankinde» qurylys kompanııalarymen seriktes baǵdarlamalary aıasyndaǵy mólsherleme 5%-dan bastalady (JTSM 5,1%-dan bastalady). Halyk Bank-te BI Group-pen birlesken baǵdarlama boıynsha mólsherleme 4,6%-dan bastalady (JTSM 6,7%-dan bastap), al Bazis-A-da – 18%-dan bastap (JTSM 20,4%-dan bastap)», dep jazady Ranking.
Tórt banktiń úsheýi – Altyn Bank, «SentrKredıt banki» jáne Halyk Bank – turǵyn úı qunynyń 20%-ynan bastap, Frıdom Fınans banki – 30 paıyzdan bastalatyn bastapqy jarnasyn suraıdy. Altyn Bank jáne Halyk Bank-te ıpotekanyń eń joǵary merzimi – 240 aıǵa deıin, «SentrKredıt banki» men «Frıdom Fınans bankinde» – 180 aıǵa deıin.
Ipotekanyń eń úlken maksımaldy somasyn «Frıdom Fınans banki» (200 mln teńgege deıin), odan keıin «SentrKredıt banki» (100 ml teńgege deıin) jáne Altyn Bank (80 mln teńgege deıin) usynady. Halyk Bank shekti somany kórsetpedi.
Sonymen qatar bıyl jyl basynda turǵyndarǵa turǵyn úı salýǵa jáne satyp alýǵa berilgen nesıeler (ıpotekalyq nesıeler) 4,86 trln teńgeni qurady, bul bir jyl burynǵydan 39,3%, al on jyl burynǵydan birden 5,3 esege artyq. Bul qazirdiń ózinde el ekonomıkasyna berilgen barlyq nesıelerdiń 21,3%-yn quraıdy, bir jyl buryn kórsetkish – 18,9% jáne on jyl buryn 9,2% ǵana bolǵan.