Prezıdentke kompanııa qyzmetiniń byltyrǵy nátıjeleri men aldaǵy kezeńge arnalǵan jospary jóninde málimet berildi, dep jazady Egemen.kz Aqordanyń baspasóz qyzmetine silteme jasap.
Qasym-Jomart Toqaevqa ótken jyldyń qorytyndysy boıynsha holdıngtiń óndiris kólemi 25,8 myń tonna ýrandy quraǵany, sonyń ishinde kompanııa úlesine 13,5 myń tonna tıesili ekeni baıandaldy. Saýda-sattyq kólemi 11 paıyzǵa ósip, 18,5 myń tonna boldy.
Meıirjan Iýsýpov Memleket basshysynyń buǵan deıin bergen tapsyrmalaryn oryndaý aıasynda «Qazatomónerkásip» elimizdiń mıneral-shıkizat bazasyn ulǵaıtý jáne geologııalyq barlaý jumystaryn júıeli túrde jalǵastyryp kele jatqanyn atap ótti. Jalpy aýdany 1 myń sharshy shaqyrymnan asatyn alty jańa perspektıvaly ýran ýchaskesinen turatyn portfel qalyptasty, al 2030 jylǵa deıin geologııalyq barlaý jumystaryna josparlanǵan ınvestısııalardyń jalpy kólemi 75-85 mıllıard teńgeni quraıdy.
Prezıdentke ýran óndirýshi óńirlerdi áleýmettik qoldaý týraly aqparat usynyldy. Máselen, 2025 jyly kompanııa oblystardyń áleýmettik-ekonomıkalyq damýyna 11 mıllıard teńgeden asa, sonyń ishinde kelisimsharttyq mindettemeler aıasynda 6 mıllıard teńge qarajat bóldi.
2025-2034 jyldarǵa arnalǵan damý strategııasyna sáıkes, kompanııa jańa ótkizý naryqtaryna qatysýdy keńeıtip keledi. Byltyr shveısarııalyq AxpoPower AG, chehııalyq ČEZ Group jáne japondyq Kansai Electric Power Co., Inc. kompanııalarymen ýran jetkizý jóninde kelisimsharttar jasaldy. Qazirgi ýaqytta Úndistanǵa tabıǵı ýran konsentrattaryn jetkizý boıynsha uzaqmerzimdi kelisimshart jasaý jónindegi jumystar jalǵasýda.
Toqaev Izraıl Prezıdenti Ishak Gersogpen telefon arqyly sóılesti
Kásiporyn ǵylymı zertteýler men ınnovasııalar salasyndaǵy jobalarǵa da atsalysady. О́ndiris tıimdiligin arttyrýǵa, ekologııalyq zııandy azaıtýǵa jáne ozyq tehnologııalardy engizýge baǵyttalǵan 2034 jylǵa deıingi ǵylymı-tehnologııalyq damý strategııasy ázirlendi.
Sondaı-aq «Qazatomónerkásiptiń» jarııa kompanııa retindegi jetistikteri atap ótildi. 2018 jyly IPO-ǵa shyqqan sátten bastap kompanııanyń naryqtyq kapıtaldandyrylýy 7 eseden asa ósti.
Kezdesý sońynda Memleket basshysy resýrstyq bazany odan ári damytý, halyqaralyq yntymaqtastyqty keńeıtý jáne áleýmettik bastamalardy iske asyrý jóninde birqatar tapsyrma berdi.
Buǵan deıin Memleket basshysy Saýda jáne ıntegrasııa mınıstri Arman Shaqqalıevti qabyldaǵanyn habarlaǵanbyz.