16 mamyr kúni Ábilhan Qasteev atyndaǵy QR Ulttyq óner mýzeıinde Halyqaralyq mýzeıler kúnine oraı uıymdastyrylǵan «Mýzeı túni» aksııasy bastaldy. Aksııanyń alǵashqy kúni mýzeıge 15 100 adam baryp, mádenı is-sharaǵa aıryqsha qyzyǵýshylyq tanytty, dep habarlaıdy Egemen.kz .
Bıylǵy aksııa «Álemder toǵysqan mýzeı» taqyrybymen ótip, ulttyq óner men zamanaýı formattardy ushtastyrǵan mazmundy baǵdarlamany qamtydy. Kelýshiler úshin kórmeler, performanstar, teatrlandyrylǵan qoıylymdar, konserttik baǵdarlamalar, sheberlik saǵattary men kvest-oıyndar uıymdastyryldy.
Is-shara aıasynda «Jeti qazyna» kórmesi kópshilik nazaryna usynyldy. Sonymen qatar balalar men jasóspirimderge arnalǵan tanymdyq-ınteraktıvti kvest-oıyny, músindeý, bilezik toqý jáne pýantılızm tehnıkasymen sýret salý boıynsha sheberlik saǵattary ótti. Aksııa elimizdegi barlyq mýzeı men mýzeı-qoryǵynda uıymdastyrylyp jatyr.
Búgin QR Ulttyq mýzeıinde skrıpkashy Nazym Mustafına óner kórsetedi. Sondaı-aq QR Ulttyq ortalyq mýzeıinde mýzeı qorlaryn saqtaý jáne kolleksııalardy tolyqtyrý taqyrybyna arnalǵan arnaıy baǵdarlama usynylady. Al mýzeı-qoryqtarda tarıhı eskertkishterge túngi ekskýrsııalar, teatrlandyrylǵan qoıylymdar jáne ózge de mádenı is-sharalar ótedi.
Aıta keteıik, búgin mýzeı kelýshileri úshin túngi saǵat 00:00-ge deıin ashyq bolady. Kirý tegin.