Astanadaǵy Beıbitshilik jáne kelisim saraıynda Qaıta órleý dáýiriniń uly oıshyldarynyń biri Leonardo da Vınchıdiń ómirine, ǵylymı izdenisteri men ınjenerlik murasyna arnalǵan «Leonardo da Vinci: Genius of the Renaissance» halyqaralyq kórmesiniń tanystyrylymy ótti, dep habarlaıdy Egemen.kz.
Kórmeniń ashylýyna QR Premer-Mınıstriniń orynbasary – Mádenıet jáne aqparat mınıstri Aıda Balaeva, kórme komıssary Olga Rıgo, Rım qalasyndaǵy Leonardo da Vınchı mýzeıiniń dırektory Avgýsto Bıadjo, sondaı-aq dıplomatııalyq korpýs ókilderi qatysty.
Aıda Balaeva ekspozısııanyń Halyqaralyq mýzeıler kúninde ótkizilýiniń aıryqsha máni bar ekenin atap ótti. Bul kún álemdik mádenı murany saqtaý, ǵylym men ónerdi damytý jáne mádenıetaralyq dıalogty nyǵaıtý ıdeıalary tóńireginde jurtshylyqty biriktiredi. Úkimet basshysynyń orynbasarynyń aıtýynsha, búginde Qazaqstanda 286 mýzeı jumys istep tur. Olardyń qorynda 4,5 mıllıonnan astam jádiger saqtalǵan. Mýzeılerge jyl saıyn 6,5 mıllıonnan astam adam keledi.
Sonymen qatar Aıda Balaeva mundaı halyqaralyq deńgeıdegi kórmeler Qazaqstandaǵy mádenı týrızmniń damýyna tyń serpin beretinin atap ótti. Osyndaı jobalar azamattardyń álemdik óner men ǵylym tarıhyndaǵy uly muralarmen óz elimizde tanysýǵa jol ashady. Sonymen qatar elimizdiń halyqaralyq mádenı keńistiktegi bedelin arttyryp, jańa áriptestik jobalarǵa negiz qalaıdy.
«Memleket basshysy Qasym-Jomart Kemeluly Toqaev atap ótkendeı, sıfrlyq tehnologııalardy ýaqyt talabyna saı ıgergen elder ǵana órkenıet kóshinen qalmaıdy. Sondyqtan Qazaqstanda ınnovasııany, kreatıvti ındýstrııany, zamanaýı mádenı jobalardy jáne jańa formattaǵy óner keńistikterin damytýǵa erekshe kóńil bólinip keledi. Osy turǵydan alǵanda, Leonardo da Vınchı murasy búgingi kúnmen de tereń úndesedi. Ol óz dáýirinde ónerdi, ǵylymdy, ınjenerııany, sáýlet pen shyǵarmashylyq oıdy bir arnaǵa toǵystyra bilgen erekshe tulǵa. Onyń izdenisteri adamzatqa oı erkindiginiń, qııal qýatynyń jáne jańashyldyqqa umtylystyń qandaı bıik nátıjege jetkizetinin kórsetti», – dedi Premer-Mınıstrdiń orynbasary.
Budan bólek, Aıda Balaeva mádenı yntymaqtastyqty nyǵaıtýǵa jáne Qazaqstan ónerin álemdik deńgeıde ilgeriletýge baǵyttalǵan iri halyqaralyq kórme jobalaryn iske asyrý boıynsha atqarylyp jatqan jumystarǵa toqtaldy. Atap aıtqanda, 2024 jyly Qazaqstanda Leonardo da Vınchıdiń qupııaǵa toly biregeı týyndylarynyń biri – «Ádemi hanshaıym» /La Bella Principessa/ kartınasy kópshilik nazaryna usynyldy. Sonymen qatar Parıjdegi Gıme Azııa óner mýzeıinde «Qazaqstan: Uly dala jaýharlary» kórmesi, Qytaıdyń Tıanszın qalasynda «Altyn adam jáne Uly dala» halyqaralyq kórmesi uıymdastyryldy. Máskeýdegi Tretıakov galereıasynda ótken «Qazaqstan óneriniń jaýharlary» kórmesi de kórermender tarapynan joǵary baǵalandy. Sondaı-aq, Qazaqstan 61-shi Venesııa bıennalesinde Ulttyq pavılonyn tanystyrdy. Al bıyl kúzde Almatyda «HH ǵasyrdaǵy orys óneriniń 30 jaýhary» kórmesin ashý josparlanyp otyr.
Aıta keteıik, Astanaǵa Rım men Florensııa mýzeılerinen Leonardo da Vınchıdiń áıgili «Vınchı kodeksterindegi» syzbalary men jazbalary negizinde qalpyna keltirilgen 40-tan astam tolyq ólshemdi mehanızm modeli jetkizildi. Eksponattar qatarynda ushý apparattary, ınjenerlik qurylymdar, áskerı mashınalar men óz dáýirinen áldeqaıda ozyq ıdeıalarǵa negizdelgen qurylǵylar bar. Keıin bul ıdeıalardyń birqatary zamanaýı tehnologııalardyń bastaýyna aınaldy.
«Búginde Astana iri mádenı jáne mýltımedııalyq jobalar ótetin mańyzdy halyqaralyq alańǵa aınalyp keledi. Bul – damý, tehnologııa jáne alǵa umtylyspen assosıasııalanatyn zamanaýı qala. Sondyqtan dál osy jerde óz zamanynan birneshe ǵasyr ozyq turǵan Leonardo da Vınchı týraly aıtý erekshe sımvoldyq mánge ıe. Kórme Astana turǵyndary men qonaqtary úshin mańyzdy mádenı oqıǵa bolatynyna senimdimin», – dedi Olga Rıgo.
Ekspozısııa shamamen 3 myń sharshy metr aýmaqqa ornalastyrylǵan. Kórme keńistigi aýa, sý, jer jáne ot taqyryptaryna arnalǵan birneshe aımaqqa bólingen. Mundaı qurylym Leonardo da Vınchıdiń tabıǵat kúshterin, qozǵalysty, adam denesiniń qurylymyn jáne mehanıka qaǵıdattaryn qalaı zerttegenin, óz baqylaýlaryn ınjenerlik sheshimder men ónertabystarǵa qalaı aınaldyrǵanyn tereńirek túsinýge múmkindik beredi.
Á.Qasteev mýzeıine bir túnde 15 myńnan astam adam bardy
Kórmeniń jeke bólimi sýretshiniń eń tanymal týyndylarynyń reprodýksııalaryna arnalǵan. Ekspozısııa mýltımedııalyq formatta bezendirilgen. LED-týnnelder, sıfrlyq proeksııalar men golografııalyq ınstallıasııalar Leonardo da Vınchıdiń ıdeıalaryn kórneki túrde tanystyryp, onyń ónertabystary qalaı jumys isteýi múmkin ekenin áserli formatta kórsetedi.
Kórme Qazaqstan Respýblıkasy Mádenıet jáne aqparat mınıstrligi men Astana qalasy ákimdiginiń qoldaýymen ótedi. Uıymdastyrýshy – «Astana Konsert» kompanııasy.
Ekspozısııa kelýshiler úshin 2026 jylǵy 19 mamyrdan 30 qyrkúıekke deıin kún saıyn, demalyssyz, saǵat 10:00-den 20:00-ge deıin ashyq bolady.
Mekenjaıy: Astana qalasy, Táýelsizdik dańǵyly, 57.