LRT iske qosylǵaly beri jolaýshylar sany 180 myń adamǵa jetken. Tek keshe ǵana jeńil relsti kólik qyzmetin 100 myń adam paıdalanǵan, dep habarlaıdy Egemen.kz.
Bul kórsetkish jobada qarastyrylǵan ótkizý múmkindiginen asyp túsken. CTS basshysy Asylbek Dúısebaev turǵyndardy qaýipsizdik erejelerin saqtaýǵa shaqyrdy.
Atap aıtqanda, tótenshe jaǵdaı bolmasa platformalar men vagondardaǵy dabyl batyrmalaryn baspaý, poıyz esikterin ózdiginen ashpaý jáne olardyń jabylýyna kedergi keltirmeý qajettigi eskertildi. Mundaı áreketter quramdardyń toqtap qalýyna sebep bolady.
CTS málimetinshe, LRT júıesi tolyq avtomattandyrylǵan ári júrgizýshisiz jumys isteıdi. Sondyqtan mundaı áreketter qaýipsizdik júıesi tarapynan jolaýshylarǵa tóngen qaýip retinde qabyldanady.
Qazirgi ýaqytta jolaýshylar aǵyny eki ese azaıǵan, qozǵalys shtattyq rejımde júzege asyp jatyr, aıtarlyqtaı zańbuzýshylyqtar tirkelmegen.
Eske salaıyq, Astanada LRT 16 mamyr kúni iske qosyldy. Prezıdent Qasym-Jomart Toqaev elordadaǵy qoǵamdyq kólikke, sonyń ishinde LRT júıesine monıtorıng júrgizip, jumysyn retteıtin Biryńǵaı dıspetcherlik ortalyqtyń qyzmetimen tanysty. Memleket basshysyna LRT júıesiniń 001 serııaly jol júrý kartasy tabystaldy.