«QMG baılanys toby men «BerÁli Mańǵystaý Company» ókilderi arnaıy jumys komıssııasyn qurý týraly kelisimge keldi, dep habarlaıdy Egemen.kz.
«BerÁli Mańǵystaý Company» kompanııasynyń burynǵy qyzmetkerleri qamaýdan bosatylyp, poıyzben Jańaózen qalasyna attandy. Bul týraly «QazMunaıGaz» kompanııasy málim etti.
Eske sala keteıik, 10 sáýirde 60-70 munaıshy Energetıka mınıstrligi ǵımaratynyń mańynda narazylyqqa shyqqan bolatyn. Alaıda jumysshylar beıbit jıyn talaptaryn buzǵany úshin ustalǵan edi. Osydan keıin jumysshylardyń talaby tender talabymen saı kelmeıtini týraly Premer-mınıstrdiń orynbasary Altaı Kólginov pikir bildirdi. Jańaózen qalasynyń ákimi Aıbek Qosýaqov turǵyndarǵa úndeý jasady.
Al munaıshylardyń talaptaryna qatysty Energetıka mınıstrligi túsinikteme bergen. Vedomstvo bul másele eńbek zańnamasy men «Samuryq-Qazyna» UÁQ» AQ satyp alý qaǵıdalaryn eskere otyryp, zańnamalyq negizde sheshilýi tıis dep sanaıtynyn aıtqan.
«QMG baılanys toby men «BerÁli Mańǵystaý Company» ókilderi arnaıy jumys komıssııasyn qurý týraly kelisimge keldi.
Ol komıssııa «BerÁli Mańǵystaý Company» kompanııasynyń burynǵy qyzmetkerleriniń talaptaryn zań aıasynda sheshý úshin qarastyrady. Komıssııa quramyna «BerÁli Mańǵystaý Company» kompanııasynyń burynǵy qyzmetkerleriniń 10 adamy kiredi.
«Quqyq qorǵaý organdary ustaǵan qalǵan munaıshylar bosatylyp, Astana ýaqyty boıynsha 8:57-de poıyzben Jańaózen qalasyna ketti», dep atap ótti kompanııadan.
Munaıshylar da Astananyń temirjol vokzalynan vıdeoúndeý jasap, ózderiniń din-aman ekendikterin aıtty jáne qoldaý bildirgen jerlesterine rızashylyǵyn bildirdi.