Túrkistanda – «Neke tour» respýblıkalyq baıqaýynda top jarǵan jas jubaılardyń nekesi qıylyp, marapattaldy, dep habarlaıdy Egemen.kz.
Búgin Túrkistan qalasyna atalǵan baıqaýdyń jeńimpazy atanǵan 15- juptyń 14-i keldi. Is shara barysynda olardyń nekesi qıyldy. Túrkistanǵa joldama alǵan jeńimpazdarǵa eki kún boıy qurmet kórsetiledi. Máselen, búgin romantıkalyq keshki as, fotosessııa jáne mádenı baǵdarlama uıymdastyrylsa, erteń qalanyń kórikti oryndary men qala mańyndaǵy kıeli jerlerge zııarat etý josparlanǵan.
15 sáýir – Qozy Kórpesh pen Baıan Sulý kúnine oraı uıymdastyrylǵan sharany Túrkistan oblysy Mádenıet jáne týrızm basqarmasy basshysynyń orynbasary Ádil Qonysbekov ashyp berip, baıqaý jeńimpazdaryn marapattady.
«Bıylǵy jyly Ramazan aıymen tuspa-tus kelip otyrǵan «Qozy kórpesh - Baıan sulý» kúni qasıetti shaharda erekshe formatta atap ótilýde. Osy merekege oraı uıymdastyrylǵan «Neke tour» respýblıkalyq baıqaýy qoǵamnyń erekshe qyzyǵýshylyǵyn týdyrdy. El kóleminde alǵash ret uıymdastyrylǵan jobaǵa 345 jup ótinim berip, baıqaýdyń mańyzdylyǵyn arttyrdy», dedi ol.
Túrkistan qalasynyń bas ımamy nekelerin jańa qıǵan januıalarǵa otbasylyq ómirdiń jaýapkershiligi týraly túsindirip ótti.