ASTANA. 6 shilde. Búgin tań aldynda aıaqtalǵan Gollandııa jáne Kosta-Rıka quramalary arasyndaǵy matchpen shırek fınaldyq oıyndar óz máresine jetti. Osy kezdesýde penaltıden jeńiske jetken eýropalyqtar jartylaı fınalǵa shyqqan tórttikti tolyqtyrdy. Bul týraly egemen.kz habarlady.
Aıtary joq, bul matchtyń qorytyndysynda joldan shyǵyp qalǵandarymen, Kosta-Rıka fýtbolshylary erledi. Olar týrnırdegi oıyndardyń negizgi jáne qosymsha ýaqyttarynda bir ret te jeńilmesten chempıonatty bitirdi.
Gollandııa – Kosta-Rıka 0:0. Penaltı -4:3.
6 shilde. Salvador. «Fonte-Nova» stadıony. 51 179 kórermen. Tóreshi – Ravshan Irmatov (О́zbekstan).
Gollandııa: Iаsper Sıllessen (Tım Krýl, 120+1), Memfıs Depaı (Djermeın Lens, 76), Stefan de Vreı, Ron Vlaar, Brýno Martıns Indı (Klas-Iаn Hıýntelar, 106), Dırk Kıoıt, Djordjıno Veınaldým, Deılı Blınd, Ýeslı Sneıder, Aren Robben, Robın van Persı.
Kosta-Rıka: Keılor Navas, Krıstıan Gamboa (Deıv Mırı, 79), Djonnı Akosta, Maıkl Ýmanıa, Djankarlo Gonsales, Jýnıor Dıas, Braıan Rýıs, Selso Borges, Elsın Teheda (Hose Kýbero, 97), Krıstıan Bolanos, Joel Kempbell (Markos Ýrenıa, 66).
Penaltı soqqandar: Robın van Persı, Aren Robben, Ýeslı Sneıder, Dırk Kıoıt – Selso Borges, Djankarlo Gonsales, Krıstıan Bolanos.
Penaltı soqpaǵandar: Braıan Rýıs (qaqpashy), Maıkl Ýmanıa (qaqpashy).
Eskertýler: Brýno Martıns Indı (64), Klas-Iаn Hıýntelar (111) - Jýnıor Dıas (37), Maıkl Ýmanıa (52), Djankarlo Gonsales (81), Djonnı Akosta (107).
Shırek fınaldyń aqyrǵy oıyny munyń aldyndaǵy matchtarǵa asa kóp uqsaı qoımady. Olarda kimde-kim tez gol soqsa, sol jeńiske jetse, munda tipti keshteý bolsa da gol soǵylǵan joq. Jalpy, Salvador mýndıaldyń negizgi de, qosymsha da ýaqytynda birinshi ret qaqpaǵa túsken dopty kóre almady.
Alaıda, osyǵan qaramastan, kezdesý óziniń sońyna deıin jurtty ýysynda ustady. Buǵan oıynnyń bitkenin bildiretin ysqyryq estilgenshe, qarsylastardyń qaıtpaı shaıqasqandary sebep boldy. Mundaǵy shılenisti sátter de bárinen asyp tústi. Ras, alǵashqy jıyrma mınýtta oıynnyń osylaı órbıtinin bildire qoıǵan joq. Bul aralyqta eki jaq ta bir-birleriniń qaqpalaryna týra soqqy jasaı almady. Biraq osydan keıin Gollandııa aınalymdy arttyryp, jyldamdyqty údete tústi. Osy tusta qaqpashy Keılor Navas taǵy da ózin barynsha jaqsy qyrynan kórsetti. Oıyn sońynda úzdik oıynshy atanatyn ol aldymen Robın van Persıdiń soqqysyn qaıtardy, sosyn Ýeslı Sneıderge ózin aldap túsirýge jol bermedi.
Ekinshi taımnyń basynda kostarıkalyqtar qarqynǵa qarqyn qosty. Degenmen, negizgi ýaqytta olar birde-bir ret qaqpa sheńberine týralap dop ura qoımady. Al matchtyń aıaǵyna qaraı taǵy da olardyń qaqpasy aldynda qarbalas kóbeıip, Navasqa sheberlik kórsetýge týra keldi. Taǵy da Sneıderdiń gol soǵatyn múmkindigi týdy. Biraq Ýeslıdiń soqqysy baǵannan qaıtty. Al Aren Robbenniń doby jolyn Elsın Teheda kesti. Osynyń arqasynda oıyn qosymsha taımǵa aýysty. Alaıda, qarsylastar overtaımda da kimniń myqty ekenin anyqtaı almady.
Kezdesýdiń taǵdyry penaltı arqyly sheshilgeli kele jatqanyn ańǵarǵan Lýı van Gal dereý qaqpashylardy almastyra qoıdy. Ol alańdaǵy Iаsper Sıllessenniń ornyna Tım Krýldy shyǵardy. Nátıjesinde tap osy Krýl kostarıkalyq eki oıynshynyń soqqylaryn qaıtaryp, óz komandasyna jeńis áperdi.
Damır Qojamqul.
Derekkóz: egemen.kz.
Foto: Sportbox.ru.