«Jambyl – meniń jaı atym, halyq – meniń shyn atym» atty respýblıkalyq aıtys Áýlıeata tórinde sońǵy birneshe jyl bederinde turaqty túrde uıymdastyrylyp keledi. Jyr júırikteri synǵa túsip júrgen dodada talaı jas periniń tusaýy kesildi. Al jyr alybynyń 177 jyldyǵyna arnalǵan bıylǵy alaman aıtysta taǵy bir jasóspirimniń, anyǵyraq aıtsaq, mektep oqýshysynyń juldyzy jandy.
Oblys ákimdiginiń qoldaýymen, mádenıet, arhıvter jáne qujattama basqarmasynyń uıymdastyrýymen ótken respýblıkalyq aıtysqa elimizdiń ár qıyrynan jıyrma aqyn qatysyp, sóz barymtasynda kimniń desi basym degen saýalǵa jaýap izdedi. Respýblıkalyq jyr dodasynda baq synaǵandardyń teń jartysy jergilikti aıtyskerler ekenin aıta ketken jón. Jambyldyq aqyndar óńirde ótken irikteý aıtystarynyń qorytyndysyna sáıkes respýblıkalyq dodaǵa joldama alǵan bolatyn.
Aıtystyń aqtańgeri, Qazaqstannyń eńbek sińirgen qaıratkeri Amanjol Áltaev tizgindi qolǵa alǵan, Memlekettik syılyqtyń laýreaty, Alashtyń ardakúreń aqyny Ǵalym Jaılybaı tóraǵa bolǵan, Memlekettik syılyqtyń laýreaty, jazýshy Roza Muqanova, aqyn, Májilis depýtaty Janarbek Áshimjan, aıtyskerler Ahmetjan О́zbekov, Kúmiskúl Sársenbaeva, belgili jýrnalıst Oralhan Dáýit qazylyq etken jyr dodasy óz deńgeıinde ótti.
On jupty quraǵan jıyrma aqynnyń alǵashqy aınalymdaǵy sóz saıysy kópshiliktiń kóńilinen shyqty. Al Abaı oblysynan kelgen belgili aıtysker Rústem Qaıyrtaıuly men Jambyl aýdanynyń úzdigi, 10-synyp oqýshysy Alına Aıdaralynyń arasyndaǵy tartysty sóz barymtasyna Balasaǵun atyndaǵy ortalyq konsert zalǵa jınalǵan jurtshylyq qoshemetti aıamady. Sondaı-aq Jaıyqtyń jaǵasynan kelgen Jansaıa Mýsına men jambyldyq Dıdar Apbasovtyń arasyndaǵy aıtys ta joǵary deńgeıde ótkenin aıta ketken lázim.
Birinshi aınalym aıaqtalǵannan keıin qazylar alqasy oılasa kele tórt aqyndy fınaldyq kezeńge ótkizýdi jón kóripti. Olardyń qatarynda osy aıtystyń jańalyǵyna aınalǵan jambyldyq jasóspirim Alına Aıdaraly da bar. Fınaldyq kezeńde birinshi bop sahnaǵa shyqqan Rústem Qaıyrtaıuly men oraldyq Jansaıa Mýsına arasyndaǵy aıtys kópshilik tarapynan joǵary baǵaǵa ıe boldy. Ásirese Rústemniń: «Halyq – meniń shyn atym» degen adam, halyqty muqatýy múmkin emes» dep jyrlaǵany jurttyń kóńiline qonǵany anyq.
Qyzylordalyq Nurmat Mansurovpen sóz saıysqa shyqqan Alına Aıdaraly tájirıbeli qarsylasynan bir mysqal kem túspeı, teń dárejede aıtys kórsetkenin de aıta ketken jón. «Jer kindigin qolyma ustatsa da, Jambyl jurtyn ketpespin almastyryp» dep jyrlaǵan mektep oqýshysyna jerlesteri tolassyz qoshemet kórsetti.
Ala tańnan ymyrt úıirilgen shaqqa deıin sozylǵan respýblıkalyq jyr dodasynyń qorytyndysynda Alına Aıdaraly bas júldege laıyq dep tanylsa (1 mln teńge qarjylaı syılyq), Abaı oblysynan kelgen adýyndy aqyn Rústem Qaıyrtaıuly birinshi oryndy, Batys Qazaqstan oblysynyń aqyny Jansaıa Mýsına ekinshi oryndy, qyzylordalyq Nurmat Mansurov úshinshi oryndy ıelendi. Sondaı-aq Birjan Baıtýov, Raýan Haıdar, Jarqyn Juparhan, Darhan Ábdimanat, Muhtar Qonarbaev, Shapaǵat Sábıtqyzy arnaýly júlde ıegeri atandy. Aıtysqa qatysqan ózge aqyndar da qarjylaı syılyqtan qur qalǵan joq.
Jambyl oblysy