Elimizde ulttyq qurama komandalaryn jasaqtaý qaǵıdaty ózgerdi, ol úshin qoldanystaǵy zańnamaǵa túzetýler engizildi, dep habarlaıdy Egemen.kz Mádenıet jáne sport mınıstrligine silteme jasap.
Endi quramaǵa jyldyń basty respýblıkalyq jáne halyqaralyq jarystarynda 1-den 8-ge deıin oryn alǵan sportshylar qabyldanady.
Aıta keteıik, buǵan deıin quramalar tek chempıondar men júldegerlerden ǵana jasaqtalǵan edi.
Atalǵan ózgeris boks, dzıýdo, grek-rım kúresi, erkin kúres, áıelder kúresi, bıatlon, shańǵy jarysy, taekvondo WTF sport túrlerine qatysty.
Sporttyq oıyn túrlerine de osy tártip qoldanylady, biraq negizgi jáne qosalqy komandalarǵa jyldyń basty respýblıkalyq jáne halyqaralyq týrnırlerinde 1-den 10-shy orynǵa deıin ıelengen sportshylar shaqyrylady.
«Biz daryndy sportshylar úshin ulttyq qurama qataryna qosylý múmkindigin ulǵaıtýymyz kerek dep sanaımyz. Ásirese, bolashaǵynan zor úmit kútetin, tájirıbeli, daryndy, jas sportshylar úshin, onyń ishinde aýyl sportshylary úshin jaqsy múmkindik. Bul ózgerister paıdaly bolady jáne durys básekelestiktiń damýyna yqpal etedi dep úmittenemiz», dedi Mádenıet jáne sport mınıstri Ashat Oralov.