23 sáýir – dúnıejúzilik kitap jáne avtorlyq quqyq kúni qarsańynda A.S.Pýshkın atyndaǵy Shyǵys Qazaqstan oblystyq kitaphanasynda «Bilim kitapta» atty baspasóz salony kelýshilerdi qushaq jaıa qarsy aldy, dep habarlaıdy Egemen.kz.
Baspasóz salony quramyndaǵy óńirlik avtorlar, baspalar men kitap satý uıymdaryna ózderin, toptamalaryndaǵy jańalyqtaryn kórsetip, paıdaly iskerlik tanystyq ornatty. О́z ónimderi men tehnologııalaryna nazar aýdartýǵa erekshe múmkindik jasady.
Kitaphanada «Shyǵys aqparat», «Argo» baspalary, joǵary oqý oryndardyń ýnıversıtettik baspalary jáne «Zveno Altaıa» ádebı birlestigi músheleri, «Tŏr Altai», «Altaı Izýmrýdnyı», «Kedr» ádebı jýrnaldarynyń redaksııalyq alqalary óz ekspozısııalaryn kelýshiler nazaryna usyndy.
Jańa Buqtyrma kentinen osy is-sharaǵa arnaıy kelgen Natalıa Strelsova balalarǵa arnalǵan «Hochý na malenkıı ostrov» jáne «Lýnnaıa koshka» óleńder jınaqtaryn usynsa, jazýshy Savelıı Mýjchıl óz kitaptaryn tanystyrdy.
Jýrnalıst Álibek Qańtarbaev, aqyn, jýrnalıst Gennadıı Pýssep syndy zııaly qaýym ókilderi merekemen quttyqtap, izgi lebizderin bildirdi.
Baspa ónimderiniń kórmesi, kitap jármeńkesi 23 sáýirge deıin jumys istedi. О́ńirde ádebıettiń zamanaýı damý tendensııalaryna qyzyǵýshylyq tanytqan oqyrman is-sharaǵa kelip, tyń dúnıelermen tanysty.