Áleýmettik jelide dosynyń qyzyna donor bolyp, kishkentaı sábıdiń ómirin aman alyp qalǵan er adamnyń ıgi isi kópshilikti tánti qyldy. Osy oraıda Egemen.kz tilshisi «Búgingi kúnniń naǵyz batyry» atanǵan Bekarystan Amanjolovpen suhbattasyp, ota jaıly tyń derek jınady.
- Bekarystan myrza, otadan keıingi jaǵdaıyńyz qalaı?
- Qazir otadan keıingi úsh kúnge qaraǵanda jaǵdaıym áldeqaıda jaqsy. Ol kezde ýaqyt ótpeıtindeı bolyp kórinetin. Júrip-turýymnyń ózi qıyn boldy. Allaǵa shúkir, dárigerler, dosym men jubaıym maǵan jaqsy kútim kórsetti, sonyń arqasynda tósekten tez turyp kettim. Áıtse de, keıde ózimdi jaısyz sezinemin.
- Ásııanyń dıagnozyn qalaı bildińizder?
- Sábıdiń dıagnozyn anyqtaý qıyn boldy. Basynda oǵan qate dıagnozdar qoıyldy. Ásııa qarasha aıynda dúnıege keldi. Arada 10 kún ótkennen keıin, balanyń aýyryp, qınalyp jatqanyn baıqadyq. Naýryz aıynan bastap Ásııany elimizdiń myqty dárigerlerine qarata bastadyq. Aqyry, olar baýyr sırrozy dıagnozyn qoıdy. Odan keıin bizdi Túrkııaǵa jiberip, sol jaqta ota jasalatyny aıtyldy.
- Donor bolýǵa qalaı kelistińiz?
- Basynda úsh adam kelisken, keıin ekeýi densaýlyǵyna baılanysty bas tartýǵa májbúr boldy. Sol mezette men barlyq kerekti analızderdi tapsyryp, kishene salmaq tastap, taldaý nátıjeleri jaqsy bolǵannan keıin otaǵa kirip kettim.
- Ota jasalatynyn bilgende boıyńyzǵa úreı, qorqynysh sezimi uıalady ma?
- Árıne, qorqynysh boldy. Jalpy, maǵan jasalǵan ota bes jarym saǵatqa sozyldy. Meniń oıymsha, pyshaq astyna jatar aldynda tek essizder ǵana qoryqpaıtyn sııaqty. Sol kezde de jaqyn jandaryma aıtyp edim: buryn adamdar soǵysqa attanǵanda ózderiniń aman qalýynyń eki talaı ekendigin túsinetin, al sen bile tura qarnyńdy jarýǵa, ishinen baýyryńdy kesip alýǵa ruqsat beresiń. Muny oılasam, áli kúnge deıin boıyma qorqynysh uıalaıdy. Biraq baýyrymdy Ásııaǵa berýden bas tartpaıtyn edim. Balanyń ómiri qyl ústinde turǵanda, meniń qorqynyshym túk te emes. Otaǵa kirip bara jatqanda da, otadan shyqqannan keıin de qorqynysh sezimi seıile qoımady. «Ári qaraı ne bolady?» degen suraqtar jıi mazalady.
- Ásııanyń qazirgi jaǵdaıy qalaı?
- Qazir Ásııa dárigerlerdiń baqylaýynda jatyr. Oǵan jasalǵan ota alty jarym saǵatqa sozyldy. Aldymen jansaqtaý bóliminde jatyp, keıin jeke palataǵa aýysty, endi jaǵdaıy aqyryndap jaqsaryp kele jatyr. Dese de, 3 apta boıy aýrýhanada jatady. Úsh aptanyń ishinde barlyq analızderi men saraptama nátıjeleri jaqsy bolsa, aman-esen shyǵarylady. Biraq taǵy eki aı boıy túrkııalyq dárigerlerdiń qadaǵalaýynda bolady. Keıin qosymsha taǵy úsh aı úlken baqylaýda jatady. Jalpy aıtqanda, barlyǵy jarty jyldyń ishinde belgili bolady.
- Ota jasaý úshin qarajat jınalǵanyn estidik. Kerekti soma jınaldy ma?
- Kerekti qarajat jınaldy. Onyń ózi qyzyq boldy. 7 sáýir kúni dárigermen kezdesip, ota 17 sáýirde jasalatynyn bildik. Sol kúni túngi saǵat birde dáriger habarlasyp, 8 sáýir kúni bolatyn otadan bir otbasy bas tartyp, bir oryn bosaǵanyn aıtty. «Eger kelisseńizder, dál qazir emhanaǵa kelińizder» dedi. Sol ýaqytta bizge on mıllıon teńge jetpeı turǵan, sóıtip bloger Batyrjan Ibragımge habarlasyp, oqıǵanyń mán-jaıyn túsindirdik. Ol bir kúnniń ishinde 10 mıllıon teńgeni jınap berdi. Bul qarajat tek otaǵa jumsaldy. Endi bizge qazir shamamen 7 mıllıondaı jetpeı tur. Ásııanyń emdelýine, dárisine, ári qaraı qaralaýyna qarajat kerek. Ony ózimiz aqyryndap jınap, retin keltirýge tyrysyp jatyrmyz. Qolyushyn sozamyn degen azamattar bolsa myna nómirge
8-775-396-18-46 aqshalaryn jibere alady.
- Áserli suhbatyńyzǵa rahmet! О́zińizge jáne Ásııaǵa zor densaýlyq tileımiz!