Búgin Astanada jalpyqalalyq senbilik ótti. Oǵan qalanyń 62 myńnan astam turǵyny, eńbek ujymdary, memlekettik organdardyń qyzmetkerleri, bıznes ókilderi jáne t.b. qatysty, dep habarlaıdy Egemen.kz elorda ákimdiginiń resmı saıtyna silteme jasap.
«Jasyl Astana» ekologııalyq aılyǵy aıasynda elordada alǵashqy úlken jalpyqalalyq senbilik ótti. Oǵan 62 myńnan astam adam – memlekettik organdardyń ókilderi, bıznes-qoǵamdastyqtar, eriktiler, eńbek ujymdary, jastar, qoǵam qaıratkerleri, sportshylar, ártister, basqarýshy uıymdar jáne qalanyń belsendi turǵyndary qatysty.
Olardyń árqaısysy elordada tazalyq pen tártiptiń ornaýyna óz úlesin qosty.Qala turǵyndary búkil kireberister men óz aýlalarynyń tazalyǵyna atsalysty.«Búgin sómkemizdi arqalap, qolǵaptarymyzdy kıip, qolymyzǵa kúrek alyp, jalpy senbilikke shyqtyq. Tipti balalar da bizben birge qoqys jınady. Aǵashtardyń túbi áktelip, retke keltirildi. Tazalyqtyń ornaǵanyna qýanyp otyrmyz. Ári mundaı is-sharalar kórshilerdi bir birimen jaqyndastyra túsip, ózara tatý etedi», deıdi Qosshyǵululy kóshesindegi úıdiń turǵyny Baqyt Quspetova.
Merdigerlik uıymdar shaǵyn sáýlet nysandaryn, eskertkishter men músinderdi, qoqys alańdary men konteınerlerdi jýý jáne qalpyna keltirý jumysyn júrgizdi.
Qalany jalpy tazalaý kezinde bes aýdannyń árqaısysyna aǵashtar men butalar otyrǵyzyldy. Onyń barysynda japyraqty aǵashtarǵa basymdyq berildi. Elordada barlyǵy segiz myńǵa jýyq jasyl jelek otyrǵyzyldy.
«Ekologııalyq aılyq aıasynda aýdanymyzda senbilikter únemi ótkizilip turady, onyń barysynda jasyl jelekter otyrǵyzylady. Qala turǵyndaryn senbilikterge belsendi qatysýǵa shaqyramyz. Al óz tarapymyzdan qajetti qural-jabdyqtarmen qamtamasyz etemiz. Eń bastysy, jaqsy kóńil-kúımen kelip, aýdandy kógaldandyrýǵa úles qosýy kerek», dedi Almaty aýdany ákiminiń orynbasary Muhamedııar Qojekenov.
Senbilik barysynda Prezıdenttik saıabaqta aǵash otyrǵyzýǵa túrli uıymdar men kásiporyndardyń ókilderi qatysty, olardyń arasynda dıplomatııalyq korpýs, QR Qarjy mınıstrliginiń Qazynashylyq komıteti, «Qazaqstandyq standarttaý jáne metrologııa ınstıtýty» RMK, Qoǵamdyq keńes, «Qazaq Air» AQ, Ardagerler keńesi jáne basqalar bar.
Ulybrıtanııanyń Qazaqstandaǵy elshisi Ketı Lıch is-sharadan alǵan áserin bylaısha jetkizdi.«Bárimiz Astananyń jasyl jelekti qala bolǵanyn qalaımyz. Osyǵan atsalysyp, aǵash otyrǵyzǵanyma qýanamyn. О́zim saıabaqqa qarama-qarsy turamyn», dep atap ótti Ketı Lıch.
Senbilik barysynda elordadan myń tonnadan astam qoqys jınalyp, shyǵaryldy. Qalanyń 3,3 mln sharshy metrden astam jeri tazartyldy.Elordada senbilikter serııasy aldaǵy ýaqytta da jalǵasady.