Ádettegideı Shyǵystyń bir top sýretshileri asaı-múseılerin arqalap, plenerge shyqty. Kún jylyp, jer aıaǵy keńı sala tabıǵat aıasynda etıýd jazýdy eki-úsh jyldan beri olar dástúrge aınaldyrǵan.
Belgili qylqalam sheberi Qudash Nursadyqov bastaǵan sýretshiler toby byltyr О́skemenniń irgesindegi bórtekke shyqsa, bıyl sol jaǵalaý saıabaǵyna baryp jaıǵasty. At shaptyrym aýmaqty alyp jatqan abat baqtyń ishi sýretshiler úshin taptyrmas jer. Ertistiń jaǵasy, orman-toǵaıdyń saıasy. Qustary saıraǵan baý-baǵy jaınaǵan.
О́ner mýzeıimen birlese uıymdastyrylǵan bul jolǵy plenerge Qudash Nursadyqovtyń shákirtteri de qatysty. Olar akvarelmen, maıly boıaýmen etıýd jazyp, óz baptaryn synady. Al kásibı sýretshiler bir kúnge sozylǵan sharada eki etıýdten jazyp úlgerdi.
– Tabıǵat aıasynda sýret salýdyń jóni bólek. Naǵyz shyǵarmashylyq jumys osy. Fotosýretten kóshirip emes, tabıǵatta taban astynda jazylǵan kartına qundy. Onyń teńgege shaqqandaǵy quny emes, shyǵarmashylyq baǵasyn aıtyp turmyn, – deıdi qylqalam sheberi Erjan Turǵanbaev.
Ertistiń jaǵasyna taıaý turyp, kenep betine toptasa ósken terekterdi beınelegen Gúlnár Mıǵrajqyzynyń da etıýdi erekshe kóz tartty. Endi-endi búrshik atyp kele jatqan terekterdiń keskini aınadaı kólshikke túsedi. Kól betin syzǵylaı qos úırek júzip barady. Maıly boıaýmen jazǵan etıýdi men tabıǵattyń úılesimine sýretshi sál sheginshekteı baryp, kózin syǵyraıta qarady. Keıbir tusyn saýsaq ushymen túzetken boldy. Galereıaǵa qoıa salatyndaı daıyn kartına.
Sol sııaqty jas sýretshi Mádı Qaıyrhan da jumysyn sátti aıaqtady. Sýretshilerdiń bıylǵy jospary, plenerge júıeli túrde shyǵyp, Shyǵystyń kórikti jerlerin kenep betine túsirý.
Shyǵys Qazaqstan oblysy