Elimizdegi eń kóne shaharlardyń biri Túrkistan búginde ınfraqurylymy damyǵan, mádenı ortalyqtary kóz tartatyn jasyl jelekti, kórikti qalaǵa aınaldy. Sońǵy jyldary erekshe ózgergen qasterli shahar endi ultymyzdyń rýhyn kóteretin keleshegi kemel Túrkistan retinde de damyp keledi. Osy qalanyń baıyrǵy turǵyny meni zamanaýı da erekshe arhıtektýralyq sheshimmen, shyǵystyq úlgimen salynǵan jańa ǵımarattardyń kóptigi qýantady. Týrızmniń damýyna, qonaqtarǵa sapaly qyzmet kórsetýge septigin tıgizetin nysandar kóp.
Búginde elimizdiń tarıhy men mádenıeti baı, adamdardyń rýhanı kúsh jınaýǵa keletin orynǵa aınalǵan qalada týrızm klasteriniń basym baǵyty, kólik ınfraqurylymy qolaıly jolǵa qoıylǵan. Halyqaralyq kólik magıstraliniń jelisinde ornalasqan kóne shahardyń jańarýy halyqtyń izgi nıet-tileginen týyndaǵan ózgeris dep bilemin. Túrki dúnıesiniń rýhanı astanasy – Túrkistanǵa taǵzym etý úshin arnaıy kelgen Prezıdent Qasym-Jomart Toqaev kóne qalany elimizdiń altyn besigi, mádenıetimiz ben rýhanııatymyzdyń rámizine jáne búkil halqymyzdyń boıtumaryna balady. Bul qasıetti jerdi kózdiń qarashyǵyndaı saqtap, damytý qajettigin aıtty. Oblysty damytýdyń 2024 jylǵa deıingi áleýmettik-ekonomıkalyq bas josparyna saı 5 jylǵa 1 trln 236 mlrd teńge bólindi. Búgingi qarqyndy qurylys, salynǵan ınvestısııa eldiń ıgiligi úshin atqarylyp jatqan dúnıe ekeni málim.
Qazir Túrkistan qalasyn damytýdyń II kezeńi josparly júzege asyrylyp jatyr. Túrkistan qalasynyń ákimi Nurbol Turashbekovtiń aqparat quraldaryna bergen deregine súıensek, bıyl qańtar-naýryz aılarynda kıeli qalaǵa kelýshiler men týrısterdiń sany 130,5 myń adamǵa jetken, ıaǵnı byltyr osy kezeńmen salystyrǵanda 7,4%-ǵa ósti. Qala turǵyndarynyń qolaıly ortada ómir súrýlerine barlyq jaǵdaı jasalyp otyr. Mysaly, qalada gaz tutynýshylar 98 paıyzdan assa, bıyl elektrmen qamtýdy 99%-ǵa jetkizý josparlanǵan. Túrkistannyń jalpy aýmaǵy sońǵy úsh jylda 19,6 myń gektardan 22,4 myń gektarǵa ulǵaıyp, halyq sany 165,4 myń adamnan 220 myńǵa artty. Prezıdent tapsyrmasyn oryndaý úshin onyń jergilikti ókilderi de ádil, týrashyl, halyqqa jaqyn bolýy tıis. Ál-Farabı babamyz: «Baqyt – árbir adam umtylatyn uly maqsat» dep, oǵan tek bilim men ıgilik nátıjesinde ǵana jetýge bolatynyn, qalany basqarý úshin izgilik qasıetter bolýy kerek ekendigin, qaıyrymdy ákim basqarǵan qalanyń kórki asqaqtap, adamdary da baqytqa bólenedi dep aıtqandaı, búgingi tańda qalyń eldiń kóńilinen shyǵatyn ákimder sanaýly ǵana. Al eki jylǵa jýyq ýaqyt Túrkistan qalasyna basshylyq jasap kele jatqan Nurbol Turashbekov halyqtyń turmys-tirshiligine nazar aýdaryp, óndiris oryndaryn kóbeıtýge ekpin berip keledi. Jurtshylyqpen arqa-jarqa áńgimelesý úshin aldymen, sol jurttyń jaǵdaıyn jasaýdy durys kórgen syńaıly. Basty maqsaty – eńbek adamdaryn laıyqty kótermeleý, talantty jastarǵa qoldaý kórsetý. Barynsha «Halyq únine qulaq asatyn memleket» qalyptastyrýǵa yntaly. Áleýmettik jelide Túrkistan qalasy týraly másele shyqsa, dereý túıindi sheshýge atsalysady, árdaıym ashyq dıalogke shyǵady. Ýaqytynyń basym bóligi qalanyń qaınaǵan tirshiligin aralap, qurylys oryndarynyń jumysyn qadaǵalap, tıisti oryndarǵa tapsyrma beredi. Qalamyzda kóptegen úıler memlekettik turǵyn úı baǵdarlamasy boıynsha salyndy. Jańa turǵyn úılerdiń basym bóligi kópbalaly otbasylar men múmkindigi shekteýli jandarǵa berilgen. Sonymen qatar qalada birneshe áleýmettik dúkender de bar. Qalanyń ekologııalyq ahýalyn jaqsartý jáne mádenı ortalyqtardy kóbeıtý maqsatynda túrli saıabaqtar boı kóterdi. Aýlalardy kógaldandyrý jáne turǵyndar úshin qolaıly jaǵdaı jasaý jumystary da qatarlasa atqarylyp keledi. Qala turǵyndarynyń usynysy boıynsha jýyrda demalys oryndary «Otbasy» saıabaǵymen tolyqty. Kóptegen jaqsy jobalar júzege asyrylýda. Atap aıtqanda, qonaq úıler, bordaqylaý kesheni, sút fermasy, muz saraıy, at sporty kesheni, sondaı-aq Memleket basshysynyń tapsyrmasyna sáıkes bıyldan bastap «Jaıly mektep» baǵdarlamasy aıasynda toǵyz úlken mektep salynady.
Kóne Túrkistannyń qandaı qala bolǵanyn bildiretin nysandar kóp. Degenmen aýmaǵy ulǵaıǵan búgingi qalanyń tynys-tirshiligi, kelbeti bólek. Búginde qarqyndy qurylysymen qatty ózgergen qalanyń qaı bóliginen de kóneniń belgisindeı kózge túsetin keseneniń munarasy menmundalaıdy.
Ǵalymjan BIMURZAEV,
Túrkistan joǵary medısına kolledjiniń dırektory, medısına ǵylymdarynyń kandıdaty