Almatyda jeke menshik kúzet qyzmetin tártipteıtin zańnamany jetildirýdiń jaıy ashyq ári baıypty túrde talqylandy. Bul jıyndy Májilistiń Zańnama jáne sot-quqyqtyq reforma jónindegi komıteti, Ishki ister mınıstrligi jáne respýblıkanyń Kúzet uıymdary assosıasııasy uıymdastyrdy. Pikirtalasqa Májilis depýtattary, sonyń ishinde atalmysh komıtettiń jumys tobynyń jetekshisi Berik Bekjanov, Ishki ister mınıstriniń orynbasary Aleksandr Kýlınıch, basqa da mınıstrlikter men vedomstvolardyń ókilderi, sondaı-aq kúzet qyzmeti sýbektileriniń basshylary qatysty.
Bizdiń elimizde kúzet qurylymdaryna azamattardyń ómiri men densaýlyǵyn, sonymen birge zańdy jáne jeke tulǵalardyń múlkin zańsyz qol suǵýshylyqtardan senimdi qorǵaýdy qamtamasyz etýge múmkindik beretin aıtarlyqtaı tolyq normatıvtik-quqyqtyq negiz jasalynǵan. Qazirgi ýaqytta memlekettik emes kúzet qyzmetin 80 myńnan astam adam atqarýda. О́tken jyly olar 1500-ge jýyq qylmysty ashty, myńdaǵan quqyq buzýshylyqtardy anyqtady, kóptegen tártip buzýshylar ustalyp, ishki ister organdaryna jetkizildi.
Degenmen, tájirıbe qoǵamdyq qaýipsizdikti qamtamasyz etýde barlyq rezervterdiń birdeı iske qosylmaı otyrǵanyn kórsetýde. B.Bekjanovtyń baıandaýyna júginsek, Májiliste birqatar zań aktilerine, sonyń ishinde Ishki ister mınıstrligi ázirlegen “Kúzet qyzmeti týraly” Zańǵa ózgerister men tolyqtyrýlar engizý jónindegi zań jobasy talqylanýda. Talqylaýǵa qatysýshylar jobanyń kúzet agenttikteriniń quqyqtaryn keńeıte túsetin birqatar erejelerin maquldady. Atap aıtqanda, olarǵa lısenzııalary bolǵan jaǵdaıda, kúzettiń tehnıkalyq quraldaryn qurastyrýmen jáne qyzmet kórsetýmen shuǵyldanýǵa, sondaı-aq zańsyz qol suǵýshylyqtardan quqyq sheńberinde qorǵaný tásilderi boıynsha aqyl-keńester men usynystar aıtýǵa múmkindik berilmek. Kúzetshiniń quqyǵy men mindetterin aıqyndaıtyn normalar engizildi. Demek, ol tártip buzýshylyqqa kese-kóldeneń turyp, qylmyskerdi ustaýǵa qaqyly. Osy kezde oǵan kúsh qoldanýǵa jáne arnaıy quraldardy paıdalanýǵa ruqsat etiledi. Sondaı-aq, ol nysannyń ózin de, ári onyń tóńiregindegi aýmaqty da qorǵaýǵa erikti. Kúzetshiniń quqyqtary keńeıtilip qana qoımaı, onyń jaýapkershiligi de arttyrylady. Zań jobasy qabyldana qalǵan jaǵdaıda bul qyzmetke buryn sottalǵan azamattar alynbaıdy, kadr irikteý oraıynda basqa shekteýler de engizilmek.
Kúzet agenttikteriniń basshylary, kúzet qyzmeti salasynyń mamandary otandyq jáne sheteldik, atap aıtqanda, reseılik tájirıbege súıene otyryp, zań jobasyn jetildirý jóninde naqty usynystar engizdi.
Qorǵanbek AMANJOL,
“Egemen Qazaqstan”.