Mádenıet jáne óner qyzmetkerleriniń kúnine oraılastyrylǵan is-sharalar aıasynda «Roza Baǵlanova atyndaǵy «Qazaqkonsert» memlekettik konserttik uıymynda «Mádenıet salasy: jańalyqtar men serpilister» taqyrybynda dóńgelek ústel ótti, dep habarlaıdy Egemen.kz.
Is-sharaǵa qatysýshylar zamanaýı jaǵdaıda salany damytýǵa qatysty ózekti máselelerdi talqylady.
Dóńgelek ústelge QR Mádenıet jáne sport mınıstrligi Mádenıet komıtetiniń tóraǵasy Roza Káribjanova, «Roza Baǵlanova atyndaǵy «Qazaqkonsert» memlekettik konserttik uıymynyń dırektory Aqtoty Raıymqulova, Aqtóbe oblysy Mádenıet, arhıvter jáne qujattama basqarmasynyń basshysy Altynaı Iýnısova, Abaı oblysynyń Mádenıet, tilderdi damytý jáne arhıv isi basqarmasy basshysynyń orynbasary Nazıra Ydyrysova, Jetisý oblysy Mádenıet, arhıvter jáne qujattama basqarmasy Mádenı mura jáne kitaphana isin uıymdastyrý bóliminiń basshysy Gúlmıra Qalqabaeva, E. Rahmadıev atyndaǵy Memlekettik akademııalyq fılarmonııa dırektory Erlan Dákenov qatysyp, baıandama jasady. Sondaı-aq atalǵan is-sharaǵa oblystar men respýblıkalyq mańyzy bar qalalardan kelgen Mádenıet basqarmalarynyń, oblystyq fılarmonııalardyń basshylary jáne shyǵarmashylyq ujymdary men ártisteri qatysty.
Alǵashqy sóz kezegin alǵan Mádenıet jáne sport mınıstrligi Mádenıet komıtetiniń tóraǵasy Roza Samıdollaqyzy qatysýshylardy kásibı merekelerimen quttyqtap, búgingi kezdesý mádenıet qaıratkerlerine shyǵarmashylyq turǵydan ózin-ózi tanytýǵa múmkindik beretinin atap ótti.
«Kásibı mereke qarsańynda, elordamyz Astanada eń úzdik mádenıet qaıratkerlerin jınadyq. Búgingi bas qosýymyzǵa sebep bolǵan osy tól merekemiz ekeni belgili. Eki kún qatarynan ótkizilgen sheberlik sabaqtarynan sizder biraz tájirıbe jınadyńyzdar degen oıdamyz. О́z baǵalaryńyzdy berip, jumys oryndaryńyzda bólise jatarsyzdar. Bul sizderge úlken tájirıbe», dedi R. Káribjanova.
Kelesi sóz kezegin alǵan «Roza Baǵlanova atyndaǵy «Qazaqkonsert» memlekettik konserttik uıymynyń dırektory Aqtoty Rahmetollaqyzy óńirlerden kelgen áriptesterin kásibı merekelerimen quttyqtady. Sondaı-aq «Qazaqkonsert» basshysy mekeme ártisteriniń sońǵy kezderi respýblıkalyq jáne halyqaralyq iri jobalarǵa belsene qatysyp kele jatqanyn aıtty.
«Jaqynda biz «Gúlder» ansambliniń tusaýkeser-konsertin elordamyz Astanada jáne Almaty qalasynda ótkizdik. Odan bólek óner ujymy álemdik týrne boıynsha AQSh, Fransııa, Shveısarııa, Belgııa, Horvatııa, Slovenııa, Avstrııa, Majarstan elderinde arnaıy konsert berip qaıtty. Taǵy bir jaqsy jańalyǵymyz bar. Buıyrtsa, 2-3 maýsym kúnderi «Astana Musical» teatry 17-shi halyqaralyq mıýzıkl festıvalinde (DIMF) «Roza Baǵlanova» mıýzıklimen óner kórsetý úshin gastroldik saparǵa shyǵady», dedi A.Raıymqulova.
Sondaı-aq mekeme basshysy «El birligi – Jańa Qazaqstan» jobasy boıynsha byltyr jańadan qurylǵan Abaı, Ulytaý, Jetisý oblystaryna, Qyzylorda oblysyna, Pavlodar, Qaraǵandy, Almaty, Petropavl qalalaryna, bıyl Mańǵystaý, Batys Qazaqstan, Atyraý, Aqtóbe oblystarynyń ortalyǵy men monoqalalarynda, birqatar aýdan men eldi mekenniń halqyna «Qazaqkonsert» óner ujymynyń arnaıy gastroldik saparda bolyp qaıtqany jóninde de tilge tıek etti. Atalǵan joba boıynsha 2025 jylǵa deıin 28 aýdan, 29 monoqala, 20 oblys ortalyǵynyń turǵyndary kezeń-kezeńmen qamtylady.
Kezdesý sońynda Roza Káribjanova dóńgelek ústelge qatysýshylardyń suraqtaryna jaýap berdi. Mádenıetti memleket tarapynan qoldaýdyń tıimdi ádisteri týraly aıta kele:
«Búginde memlekettik organdar mádenıetke kóp kóńil bólýde. Aıta keterligi, halyqtyń mádenı ónimdermen qamtamasyz etý deńgeıiniń artýy 74 paıyzdy qurasa, bul kórsetkishti 80 paıyzǵa jetkizý josparlanýda. Osyǵan oraı, baıqaýlar men festıvalder ótkizý boıynsha shyǵarmashylyq bastamalardy júzege asyrýǵa qatysty usynystaryńyzdy qoldaýǵa daıynbyz. Memleket basshysy Qasym-Jomart Toqaevtyń tapsyrmasyna sáıkes, daryndy shyǵarmashyl jastardy qoldaý úshin halyqaralyq festıvalderdi uıymdastyrý isi qolǵa alyndy. Odan keıin dástúrli halyq mýzykasyn jyrshylar men termeshiler arasynda keńinen nasıhattaý maqsatynda da jobalardy belsendirek uıymdastyrǵan jón», dedi.
Sondaı-aq R.Káribjanova mekemelerdegi shtattyq qurylym, eńbekaqy máselesi, jańa mádenıet saıasatynyń tujyrymdamasynyń bekitilýi, gonorar tóleý, eskertkishterdi turǵyzý, óńirlerdegi rejısserlerdi shyǵarmashylyq jumystarǵa tartý, ulttyq bı, ázil-ysqaq janryn jandandyrý jáne t.b. máseleler jóninde aıtyp ótti. Erkin formatta ótken dıalog alańynda qonaqtar ózara pikir almasyp, jan-jaqty jaýaptaryn aldy.
Mádenıet jáne óner qyzmetkerleri kúnine arnalǵan is-sharalar Mádenıet jáne sport mınıstrliginiń qoldaýymen uıymdastyrylyp otyr.