Tarazda paraqor áskerı polıseı ustaldy. Jambyl oblystyq ekonomıkalyq qylmysqa jáne sybaılas jemqorlyqqa qarsy kúres departamentine S. degen azamattan aryz túsipti. Ol Ishki ister mınıstrliginiń №5513 áskerı bólimi áskerı polısııa bólimshesiniń aǵa anyqtaýshysy, polısııa kapıtany R. degen azamattyń ózin qylmystyq jaýapkershilikke tartpaý úshin aqsha talap etkenin aıtqan. Aqsha berse, isti bolýdan qutqaramyn degen áskerı polıseı qyzmeti úshin alatyn aqshasynyń da kólemin naqty aıtyp, eki jaq 50 myń teńgege kelisipti.
Biraq, isti bolýshy qarjynyń barlyǵyn birden bere almaıtynyn jetkizgen. Aldyn ala júrgizilgen jedel-izdestirý sharalary kezinde qarjy polısııasynyń qyzmetkerleri áskerı polıseıdiń 20 myń teńge aqsha alǵan sátin tirkegen. Erteńine qalǵan 30 myń teńgeni alyp jatqan kezinde ózi de qolǵa tústi. Kinásin birden moıyndaǵandyqtan, sotqa deıingi jeńildetilgen is júrgizý óndirisi boıynsha qylmystyq is qozǵaldy.
Jambyl oblysy boıynsha Ekonomıkalyq qylmysqa jáne sybaılas jemqorlyqqa qarsy kúres departamentiniń basqarma basshysy Kamal Qalybekovtiń aıtýyna qaraǵanda, kúdiktiniń ústinen Qylmystyq kodekstiń 311-baby, 2-bólimi boıynsha qylmystyq is qozǵaldy. Ol boıynsha 3 jyldan 7 jylǵa deıin bas bostandyǵynan aıyrý jazasy qarastyrylǵan.
Oralhan DÁÝIT,
«Egemen Qazaqstan».
Jambyl oblysy.