Astana ákimi Jeńis Qasymbek Instagram jelisinde qaladaǵy sý tapshylyǵy máselesine qatysty úndeý jasady, dep habarlaıdy Egemen.kz.
«Qaıyrly kún, qurmetti Astana qalasynyń turǵyndary! Sońǵy ýaqytta Astana qalasynda sý tapshylyǵy máselesi kóterilip jatyr. Ras, qalamyzda mundaı problema bar. Qazirgi ýaqytta táýligine 25 myń kýbometr sý jetispeıdi. Qalamyz kún sanap ósip jatyr. Jylyna kem degende 60-70 myń jańa turǵyn qosylady, al sońǵy 3 jyldyń ishinde qalamyzda turatyn azamattardyń sany 200 myń adamǵa artty», dedi qala ákimi.
Jeńis Qasymbektiń aıtýynsha, sońǵy aıda shaharda sýarý jumystary bastalyp ketken. Oǵan qosa, ótken aptada bolǵan +30 gradýstan asatyn aptap ystyq osy aptada da jalǵasady dep boljanyp otyr. Osyǵan baılanysty sýarý jumystary qarqyndy júrip jatyr.
«Osydan 2 jyl buryn ákimdik eki jańa nysannyń qurylysyn bastady. Birinshi nysan – qazir ózderińiz kórip otyrǵandaı, mynaý sorǵy stansııasy. Bul nysannyń qurylysy maýsym aıynyń sońyna deıin tolyǵymen bitedi. Nátıjesinde qalaǵa qajetti kúnine 25 myń kýbometr sý beriledi.
Ekinshi nysan – sý qubyry, ıaǵnı Astana sý qoımasynan qalaǵa keletin sý qubyry. Bul nysandaǵy jumystar da aıaqtalyp qaldy. Kelesi aptada tolyǵymen qurylys jumysy bitedi jáne qalaǵa qajetti sý qysymy qaıta beriledi», dep sendirdi Jeńis Qasymbek.
Bul rette Astana ákimi qaladaǵy sý tapshylyǵy máselesi bir aıdyń ishinde tolyǵymen sheshiletinin atap ótti.
Sondaı-aq tamyz aıynda joǵaryda atap ótilgen stansııanyń ekinshi kezeńiniń qurylysy aıaqtalady dep josparlanyp otyr.
«Qurylys jumystarynyń ekinshi kezeńi aıaqtalǵan soń qalaǵa kúnine qosymsha 85 myń kýbometr sý berilý múmkindigi paıda bolady. Bul aldaǵy 3-4 jylǵa jetkilikti», dep qosty elorda ákimi.