Ǵylym jáne joǵary bilim mınıstrliginiń málimetine sáıkes, negizgi UBT bastalǵannan beri 169 myń retten astam test tapsyrylǵan. Onyń ishinde talapkerlerdiń 74 paıyzy qazaq tilinde, 26 paıyzy orys tilinde, 0,1 paıyz aǵylshyn tilinde testileýden ótti, dep habarlaıdy Egemen.kz.
UBT bastalǵaly beri shekti baldy 77 paıyzdan astam talapker jınady. Ortasha balǵa keletin bolsaq, ol 69 baldy qurady. Eń joǵary ball – 137, ony elimiz boıynsha úsh talapker jınaǵan. «UBT-nyń tórtinshi aptasy aıaqtaldy. Talapkerler testileýdiń ekinshi múmkindigin qoldanyp jatyr. Osy aptada biz IELTS jáne TOEFL halyqaralyq sertıfıkattaryn «Aǵylshyn tili» boıynsha UBT baldaryna aýystyrý shkalasyn jarııaladyq. Sondaı-aq SAT, ACT, IB, A-Level standarttalǵan test baldary bekitildi. Osy sertıfıkat ıegerlerine nátıjelerin UBT balyna konvertasııalaýǵa múmkindik beredi», dep atap ótti QR ǴJBM Ulttyq testileý ortalyǵynyń dırektory Rýslan Emelbaev. Aıta keteıik, erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa tórt aptanyń ishinde 486 talapker qatysty. Búgingi tańda 229 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 175 adam shyǵarylyp, olardyń nátıjeleri joıyldy. Bógde tulǵalar anyqtalǵan joq.Mınıstrliktiń málimetinshe, 2023 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.