Elorda tórinde halyq aqyny, jyraý, ánshi jáne kompozıtor Kenen Ázirbaevtyń qurmetine músini ornatylyp, ashylý saltanaty ótti. Is-sharaǵa memleket jáne qoǵam qaıratkeri Myrzataı Joldasbekov, qalamger, akademık Ýálıhan Qalıjanuly, aqynnyń uly Baqytjan Kenenuly men qyzy Tórtken Kenenqyzy, sondaı-aq astanalyq ónersúıer qaýym qatysty.
Dala darynynyń eskertkish-bıýstin Myrzataı Joldasbekov pen Tórtken Kenenqyzy tanystyryp, lentasyn qıdy. Sonymen qatar jıyn barysynda A.Jubanov atyndaǵy mýzykalyq mekteptiń dırektory Núrken Áshirov aqynǵa arnap shyǵarǵan «Kóksholaq» kúıin oryndasa, tanymal jas talant Erjan Maksım kompozıtordyń «Shyrqa daýsym» atty ánin oryndady.
Is-sharada jazýshy, akademık Ýálıhan Qalıjanuly sóılep, aqynnyń telegeı murasynyń mańyzy jóninde aıtyp ótti.
Kenen Ázirbaev – qazaq ónerindegi sal-serilik jáne aıtyskerlik dástúrlerdi úzbeı, HH ǵasyrdyń 70-jyldaryna deıin jetkizgen ónerpaz. Dastan janryn jastaıynan jyrlaǵan. Qazaq halqynyń aıtys óneriniń nasıhatshysy. 150-deı án tolǵap, ánderi halyq súıip aıtatyn máńgilik rýhanı qazynaǵa aınaldy.
– Músinge kirispes buryn Kenen Ázirbaevtyń shyǵarmashylyǵyn jan-jaqty jınaqtap, tereńirek tanysýǵa múmkindik aldym. Ánderin tyńdap, óleńderin oqydym. Eskertkishtiń bıiktigi – 3,2 metr, al eni 70 santımetr. Qajyrly jumystyń arqasynda atamyzdyń músinin jasaýǵa eki aı ýaqyt jumsadym, – dedi músinshi Rınat Ábenov.