Memleket basshysy Qasym-Jomart Toqaev Ishki ister mınıstrliginiń alqa májilisinde qoǵamda ózekti bolyp turǵan alaıaqtyq máselesine toqtaldy, dep habarlaıdy Egemen.kz.
«Men búgin qoǵamda ózekti bolyp turǵan taǵy bir máselege toqtalǵym keledi. Qazir kóptegen azamattarymyz alaıaqtardyń aılasyna túsip, aldanyp qalyp jatyr. Sondyqtan quqyq qorǵaý organdary alaıaqtarǵa qarsy tabandy kúres júrgizýge tıis. Olarǵa eshqandaı jeńildik jasalmaýy kerek. Sebebi alaıaqtardyń jasaǵan áreketinen halyq zardap shegip jatyr», dedi Prezıdent.
Budan soń ol alaıaqtarǵa aldanǵandardyń bir mysalyn keltirdi. Jaqynda bir týrıstik kompanııa zańǵa baǵynatyn bir top azamatty aldap, olardy qajylyqqa jibergen. Endi, kinásiz adamdar Saýd Arabııasynyń polısııa ýchaskesinde qamaýda otyrýǵa májbúr.
«Osyndaı alaıaq kompanııanyń zańǵa qaıshy áreketi azamattarymyzdyń densaýlyǵyna, olardyń moraldyq jaǵdaıyna jáne jalpy elimizdiń bedeline úlken nuqsan keltirip otyr. Bul jerde, árıne, adamdardyń quqyqtyq saýatsyzdyǵy da bar. Endi, memleketimiz, ıaǵnı Syrtqy ister mınıstrligi olarǵa barynsha kómektesýi qajet. Al Ishki ister mınıstrligi alaıaq kompanııanyń basshylyǵyn, qyzmetkerlerin zańǵa sáıkes jaýapqa tartýǵa tıis. Ádiletti qoǵam quramyz desek, dál osyndaı ózekti máselelerdi sheshýimiz kerek», dedi Memleket basshysy.