Almaty mýzeıine bara qalsańyz, talaı tarıhı jádigerge kózaıym bolasyz. Solardyń biregeıi – tutas dalany dúbirge bólegen Túrksib temir jolynyń qurylysy kezinde tutynylǵan buıymdar.
Qazaq dalasyna jańalyq ala kelgen alyp temirjoldyń qurylysy jyldarǵa sozyldy. Arqasyn at tuıaǵynan basqa taptamaǵan salqar mekendi san kúıge bólegen bul shoıynjolǵa myńdaǵan eńbek adamynyń teri sińdi. Mýzeıde oryn alǵan myna bir ekspozısııaǵa eńbekkerlerdiń qurylys kezinde tutynǵan temir shamdary qoıylypty. Oǵan qosa alǵashqy rels retinde tóselgen shoıyn temirdiń bólshegi de tarıhqa aınalǵan ótken kezeńderdiń jarqyn kórinisine sapar shektiredi. Mýzeı qyzmetkeri Abadan Tileýbergenova bul buıymdarǵa kelýshilerdiń ynta-yqylasy erekshe ekenin aıtady.
«Túrkistan-Sibir temirjoly Ortalyq Azııa men Sibirdi baılanystyrý úshin salynǵan KSRO-daǵy iri magıstraldyń biri. Temirjol qurylysy bir mezette soltústikte Semeı jáne ońtústikte Lýgovoı beketterinen bastalyp, 1442 shaqyrymdyq jol 1930 jyly Aınabulaq beketinde túıisti. Túrksib temirjolynyń jolaýshylar tasymaldaıtyn baǵyttary boıynsha belgilengen kestege sáıkes Almaty-1 temirjol beketiniń kassasy da arnaıy ınstallıasııa arqyly kórermenge usynylǵan. Dala órkenıetindegi aıtýly ózgeris birqatar shyǵarmashylyq ıelerin tereń shabytqa bóledi», deıdi ol.
Qazaq beıneleý óneriniń zańǵary Ábilhan Qasteev te alǵashqy eńbek jolyn dáp osy temirjol qurylysynyń Aınabulaq beketinde jer qazýshy bolyp bastady. Kúnderdiń kúni tosyn syıy kóp tirshilik kókireginde qaınap jatqan talant bulaǵynyń baǵytyn úlken arnaǵa buryp, uly daryn týǵan topyraǵyna qubylys bolyp kelgen alyp temirjoldy kúrekpen emes, qylqalammen salyp shyqty. Keıin onyń áıgili «Túrksib» shyǵarmasy qazaq temirjolynyń pasportyna aınaldy. Túrksib temirjolynyń qurylysyna qatysty kóptegen qyzyqty derek bar. On myńnan astam adam jyldar boıy tynymsyz eńbek etken temirjol qurylysynda Turar Rysqulov pen Muhamedjan Tynyshbaevtyń róli erekshe.
ALMATY