Salǵyrttyqtyń saldary

Tótennen tóngen tilsiz jaý talaı jaıdyń betin ashyp bergendeı. Oqıǵa ornyna on mınýt bolmaı-aq jettik degen TJ qyzmetkerleri órtti bir jarym saǵatta aýyzdyqtady. О́rt sóndirý kólikteriniń apat ornyna birden ene almaýyna turǵyn úı aýlasyndaǵy jol jıegine jaǵalaı qoıylǵan jeke kólikter kedergi bolǵan. Keıbir turǵyndar jol josparynyń qolaısyzdyǵyn synǵa aldy. Mamandar ázirge tosyn oqıǵa eńseli ǵımarattyń 5 jáne 6-qabattaryndaǵy jedel­satynyń toq kabelderinen shyqqan bolýy múmkin degen boljamǵa kelip otyr. Alataý aýdanynyń ákimi Azamat Qal­dybekovtiń tóraǵalyǵymen qurylǵan jedel shtab qura­myna prokýratýra, ulttyq qaýipsizdik komıteti, polısııa basqarmasy, tótenshe jaǵdaılar departamenti ókilderi engen. Quzyrly oryndar osy oqıǵaǵa qatysty eki birdeı qylmystyq is qozǵalǵanyn málimdedi.

О́rt paıda bolǵan alǵash­qy mınýttarda túsirilgen beınejazbalardan deneń túrshige­di. Terezeden jan ushyra kó­mek suraǵandarǵa, eń aldymen, sol mańnan ótip bara jatqan qara­paıym turǵyndar qolushyn sozǵan.

Qoıý tútin tur­ǵyn úı­diń ishki bóligin tutas tum­sha­laǵandyqtan, tekpishekpen da­la­ǵa shyǵý múmkin bolmaǵan. Beınekadrdan birneshe jigittiń jerde turyp terezeden sekirgen turǵyndardy kilemmen qaǵyp alyp jatqanyn kórýge bolady. Munyń bári arnaýly qyzmet mamandary kelgenge deıin órbi­gen jaǵdaı. Oqıǵanyń kartınasyn óz kózimen kórip, qutqarý jumystaryna belsene qatysqan Dáýletqalı Nurlan dostarymen birge birneshe azamatqa kómek kórsetken.

«Tórt jigit aýlada áńgime­lesip turǵanbyz. Kenet tútin shy­ǵa bastady. Aınalada eshkim joq. Aldymen birneshe balany, kishkentaı qyzdy dalaǵa alyp shyqtyq. Odan keıin tú­tin qoıýlanyp ketti. Joǵary qabattan jaımalardy bir-birine baılap, taǵy bir balany túsirdim. Tómendegi jigitter ony qaǵyp aldy. 15-20 mınýtta 4 ret osylaı kóterilip shyqtym. Birinshi qabattaǵy páterdiń terezesinen kilem men matrasty kórdik. Te­re­ze­ni syndyrdyq ta olardy alyp shyqtyq. Sonyń kómegimen shamamen 7-8 adamdy jerden qaǵyp aldyq. Erik degen jigit esinen tanyp qalǵan úlken kisige jasandy jolmen dem berip, alǵashqy medısınalyq kómek kórsetti. Taǵy da biraz jigit aıanyp qalǵan joq, júgirip júrip zardap shekkenderge kómektesti. Keıinnen qutqarýshylar kelip, bizdi oqıǵa ornyna jolatpady», deıdi ol.

Qutqarý isiniń bel ortasyn­da bolǵan Erik Tókenuly lajy qalmaǵan áıel adam al­tyn­­shy qabattan eki balasyn laq­tyr­ǵa­nyn, ony tómennen matraspen qaǵyp alǵandaryn, artynsha álgi turǵynnyń ózi de tómenge sekir­ge­nin aıtady. Alǵashqy kómek­ke turǵyn úıge jaqyn aýmaq­ta jumys istep jatqan qury­lys­shylar da ara­las­qan.

Kóz aldynda órbigen jan aýyr­tar jaıdy jelige túsirýmen shektelip, adam ómiri arpalysqa túsken syn saǵatta qol qýsyryp qalý – adamgershilikke jat. Mun­daı sátte óz ómirin qaterge tigip, kózsiz erlikke barý kez kelgenniń kókeıine kele bermesi anyq. Keleńsiz oqıǵa oryn alǵan jerge kezdeısoq kelip, múlde tanymaıtyn adamdardy apattan arashalaýǵa atsalysqan Dáýletqalı, Erik syndy aza­mat­tar­dy búgingi qoǵamnyń batyr­­­lary desek jarasar. Aza­mat­­tardyń qaýip-qaterde bir-birine qorǵan bolýy, syn saǵat­ta judyryqtaı jumylýy izgi qo­ǵam­nyń bastaýy dep ataǵan du­rys shyǵar.

Apattyń betin qaıtarýǵa Al­maty qalasy TJD-nyń 50 qyz­­metkeri men 14 tehnıkasy, Polısııa departamentiniń 40 qyz­metkeri men 11 tehnıkasy, 109 Qutqarý qyzmetiniń 12 qyzmetkeri men 6 tehnıkasy, jedel járdem qyzmetiniń 69 ókili men 23 kóligi jumyldyryldy. О́rtengen turǵyn úıge kirýge ýaqytsha tyıym salynyp, zardap shekken turǵyndarǵa ystyq tamaq pen jatyn oryn berildi. Qala ákimi Erbolat Dosaev qaza bolǵan áıeldiń jaqyndaryna kóńil aıtyp, oqıǵadan zardap shekken sol otbasynyń taǵy bir ókiliniń saýyǵýy úshin barlyq jaǵdaı jasalatynyn jetkizdi. Sondaı-aq ákimdik órtengen turǵyn úı keshenine jaýapty kompanııamen kelissóz júrgizip, búlingen baspanany qalpyna keltirýge ýaǵdalasqan.

О́z kezeginde «Aqkent» turǵyn úı keshenin salýshy kompanııa órt saldarynan qaza tapqan Ásel Bekmuhambetovanyń otbasyna óteýsiz negizde eki bólmeli páter beriletinin habarlady.

Mıllıondar toǵysqan megapolıste eki kúnniń birinde órt jaǵdaıy oryn alyp jatady. Aqkenttegi jaǵdaıǵa qatys­ty pikir bildirgen sarapshylar qurylys sapasyn tekserý ju­mys­tary jolǵa qoıylmaǵanyn synǵa aldy.

«Eger órt tuıyqtalǵan toqtan bolsa, demek ony biligi tómen bireý istegen. Qurylys kompanııalarynda árbir jumysty qaıta tekserip otyratyn sapa menedjmenti joq. Qurylysty qabyldaıtyn avtorlyq baqylaý men tehbaqylaý kózdi jumyp qol qoıady. Ony memlekettik organdardyń qalaı qabyldap alatynyn bilemiz. О́rtten qorǵaýshylar da jyldam kelmegen sekildi. Kelgen bolsa, tur­ǵyndar kilem kerip, balkonnan adamdardy qaǵyp alýǵa uıymdaspas edi. Kelgen kúnniń ózinde joǵarydaǵylardy túsirip alatyn ıá uzyn saty joq, ıá arnaıy tehnıka joq. Eger bir turǵyn úıdiń birneshe qabatynan shyqqan tútin osyndaı tragedııaǵa alyp kelgen bolsa, jer silkinse jaǵdaı qıyn eken», dep pikir bildirdi Shyńǵys Muqan.

Sarapshy Elnazar Ahmetbek almatynyń órt qaýipsizdigin qa­da­ǵalaý isine keshendi kózqaras qajet ekenin aıtady. Onyń piki­rinshe, qurylys nysandaryn josparlaýdaǵy olqylyqtar qa­telikti keshirmeıdi. «Ásirese qa­ladaǵy kóptegen jeke turǵyn úıler tym tyǵyz ornalasqan. Birinen shyqqan órt ekinshisine áser etedi. Keıbir kóshelerdiń tarylyp ketkeni sonshalyq, órt sóndirý kólikteriniń emin-erkin qozǵalýyna eshqandaı múmkindik joq. Qurylys nysandarynyń ty­ǵyzdyǵynan aýlada kólik qoıatyn oryn tapshy. Jeke kólik­te­rin turǵyndar jol jıegine qoıýyna týra keledi. Burynǵy 3-4 qabatty úılerdiń ornyna 10-12 qabatty záýlim ǵımarattar salynatyn bolǵan. Aıadaı jerde myńdaǵan adam turady. Bul kez kelgen tótenshe jaǵdaıǵa tosqaýyl qoıýǵa keder­gisin tı­gi­zetini anyq», deıdi sarapshy.