Qamkóńil jandardy qoldaý – qoǵamǵa ortaq mindet. Qyrkúıek aıynan bastap Almatyda erekshe qajettilikteri bar azamattarǵa arnalǵan «Invataksı» jobasy keń aýqymda iske qosylady. Bastapqy eki aıda qanatqaqty joba retinde júzege asatyn bastama muqtaj jandarǵa úlken kómek bolǵaly tur.
Megapolıste «Invataksı» qyzmetin eki myńnan asa adam paıdalanady, onyń 800-i – múgedek balalar. Bıyl atalǵan qyzmetti uıymdastyrýǵa jergilikti bıýdjetten 920 mln teńge bólingen.
«Buǵan deıin qalada qosymsha qajettilikteri bar adamdardy tasymaldaýǵa mamandandyrylǵan kólik tapshylyǵy baıqalǵan edi. Ásirese ınvataksı qyzmetteriniń sapasyna qatysty eskertýler jıi bolǵan. Kórsetiletin qyzmetterdi kópshilikke qoljetimdi etý jáne sapasyn arttyrý úshin Almaty qalasy ákimdiginiń bastamasymen jáne Eńbek jáne halyqty áleýmettik qorǵaý mınıstrliginiń qoldaýymen «Iаndeks.Taksı» agregatory arqyly ınvataksı qyzmetterin usyný jobasy júzege asty», deıdi Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov.
Azamattar tarapynan aıryqsha suranys týdyrǵan jobanyń normatıvtik-quqyqtyq aktilerine Eńbek jáne halyqty áleýmettik qorǵaý mınıstrligi tarapynan tıisti ózgerister engizý josparlanǵan. Bul – óz kezeginde qosymsha qajettilikteri bar adamdar úshin qolaıly jáne qaýipsiz qozǵalýdy qamtamasyz etýdiń ońtaıly joly. Jyl saıyn bul qyzmetke qajettilik artyp keledi. Máselen 2021 jyly 1 462 múgedek adam ınvataksı qyzmetimen qamtylsa, 2022 jyly 1 488 azamat atalǵan baǵdarlamanyń kómegine júgingen.
Jobany úılestirýshiler qyzmetti jetkizýshiler úshin «Iаndeks.Taksı» platformasynda eseptik jazbalar jasalǵanyn, múgedektigi bar adamdardy qanatqaqty jobaǵa qosý múmkindigi berilgenin atap ótti. Osy jobaǵa qosylǵan múgedektigi bar adamdar «Iаndeks.Taksı» qosymshasy arqyly qyzmetterge tapsyrys berýdi yńǵaıly ýaqytta Iаndeks Go qosymshasynda arnaıy ázirlengen «INVA» tarıfi arqyly derbes júzege asyra alady. Bul jobada kúnine saparlar sanyna shekteý qoıylǵan. Máselen, múgedektigi bar bir adam úshin kúnine 2 sapardan aspaıtyn lımıt belgilengen.
Aıta ketý kerek, Almaty qalasy boıynsha qyzmet azamattardyń bes sanaty úshin usynylady. Olar – kreslo-arbamen qozǵalatyn jáne tirek-qımyl apparaty buzylǵan múgedektigi bar adamdar men múgedektigi bar balalar, kórý qabileti buzylǵan múgedektigi bar adamdar men múgedektigi bar balalar, aýtızm spektri buzylǵan múgedektigi bar jetkinshekter.