Shyny kerek, qazaqtyń tamyry aýylǵa baılanǵan. Mol munaıy bar Atyraý oblysynda meıir qandyratyn móldir sýy men taqtaıdaı tegis joly, tipti qı tasý men kúl shyǵarý taýqymetinen qutqarar kógildir otyny bolmasa da, aýyldan kóshpeı otyrǵan qandas kóp.
Qandastarymyz ataqonysynan irge kótermegen aýyldardyń keıbiri kádimgi sýsyǵan qumnan tóngen qaýipten aryla alar emes. Árıne, qum kóshkinin tabıǵattyń tylsym ári tosyn qubylysyna balaǵanmen, ony toqtatý baǵytyndaǵy jumystyń nátıjesi ázirge kórinbeı tur.
Qumdy toqtatýdyń bir joly – sekseýil egý. Biraq sekseýil egýmen aınalysatyn merdigerdiń nemquraılyǵy anyqtalyp otyr. Isataı aýdanyndaǵy Zabýryn aýylynda – 1 300, Isataı eldi mekeninde 300-ge jýyq turǵyn bar. Qaýip tóndirgen qum kóshkinin toqtatý úshin 115 mln teńge bólinip, aýyl mańyna 26 875 sekseýil egilgen. Keıbir aýyldarǵa qamystan qorshaý turǵyzylǵan. Alaıda sekseýil de, qamys ta aýyldarǵa qalqan bolmaı tur.
«Biz qumnyń azabyn kóremiz dep oılaǵan joq edik. Apta saıyn traktormen qum kúretemiz. Biraq qum álsin-álsin borap, qaýip tóndirip tur. Keıingi kezde esik-terezeni ashý muńǵa aınaldy. Bir kúni qum úıimizdi basyp qalýy múmkin. Kóńilde osyndaı qaýip bar», deıdi aýyl turǵyny Farýza Sultanálıeva.
Isataı aýylynyń ákimi Aslan Ǵubashtyń aıtýynsha, qazir taǵy da jobalaý-smetalyq qujat daıyndalyp jatyr. Ázirge aýyl ishindegi qumdy kólikke tıep shyǵarýdan basqa amal joq.
Oblystyq tabıǵı resýrstar jáne tabıǵatty paıdalanýdy retteý basqarmasy basshysynyń orynbasary Nurgúl Qalıevanyń málimetinshe, merdiger mekeme kemshilikti túzetýge ýáde bergen. Sol ýáde oryndalmasa, jergilikti bılik sotqa júginbek.
Degenmen byltyrdan beri Qurmanǵazy aýdanyndaǵy Úshtaǵan aýylynda 10 gektarǵa 9 370 dana sekseýil kósheti egilgen. Endi Isataı aýdanynyń Naryn aýylynyń mańyndaǵy 8 gektarǵa, Qyzylqoǵa aýdanynda ornalasqan Saǵyz, Qarabaý, Qarakól, Jasqaırat, Búırek aýyldarynda 32,45 gektarǵa sekseýil kóshetin egý úshin smetalyq jobasy jasaqtalyp jatyr.