2023 jylǵy 10 sáýirde bıdaıdy avtomobıl kóligimen Qazaqstan aýmaǵyna, onyń ishinde EAEO-ǵa múshe memleketterden ákelýge tyıym salý sheshiminiń ýaqyty 2023 jylǵy 10 qazanda aıaqtalady. QR Premer-mınıstriniń orynbasary – Saýda jáne ıntegrasııa mınıstri Serik Jumanǵarınniń tóraǵalyǵymen 2023 jylǵy 10 tamyzda ótken syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııa (VAK) otyrysynyń sheshimimen qatysýshylar tyıym salýdy belgili bir shekteýlermen taǵy alty aıǵa uzartý týraly ortaq pikirge keldi, dep habarlaıdy Egemen.kz Úkmettiń baspasóz qyzmetine silteme jasap.
Sheshim bıdaıdy QR-na ákelýdiń jáne ony Reseı Federasııasymen shekaralas aımaqtarynan avtomobıl kóligimen reeksporttaýdyń «sur shemalaryn» boldyrmaý maqsatynda qabyldandy. Bul rette otandyq aýyl sharýashylyǵy taýaryn óndirýshilerdi tuqym materıalymen qamtamasyz etý maqsatynda tuqymdardy avtokólikpen jetkizýge ruqsat etiledi. Biraq bul jaǵdaıda partııalar tuqymnyń sapasy týraly kýálikpen qosa birge júrýi kerek.
Budan bólek, lısenzııalanǵan elevatorlardyń, astyq óńdeýshilerdiń, qus sharýashylyǵy kásiporyndarynyń atyna jetkizilimderdi qospaǵanda, ımporttyq bıdaıdy Qazaqstan aýmaǵyna jáne temirjol kóligimen ákelý shekteledi. Avtokólikke tyıym salýdy uzartý jáne temirjol shekteýlerin engizý týraly buıryqty Aýyl sharýashylyǵy mınıstrligi ázirleıdi.