Jýyrda Talǵar aýdany Erkin aýylynyń mańaıyndaǵy «Baıserke» áýe aılaǵynda Ulttyq ǵylym akademııasynyń bastamasymen jetekshi ǵalymdar bas qosyp, otandyq avıasııa salasynyń jetistikteri tanystyryldy.
Otandyq tuńǵysh «Araı» áýe kemesiniń óndirisi ǵalymdardy beıjaı qaldyrmady. Erekshe tehnologııalyq jetistikteri bar áýe kemesi kez kelgen jerde ushyp-qonýǵa qolaıly. Atalǵan ushaqty 2011 jyly qurylǵan «AviaMaster Aircraft» kásiporny shyǵarǵan. Ushaqtyń barlyq quramdas bólshegi AQSh pen Kanadanyń avıasııa bıliginiń maquldamasynan ótken. Joba avtory Dáýren Ýálıev ǵalymdarǵa onyń múmkindikterin túsindirip berdi. «Ushaq 1 myń shaqyrymǵa deıin usha alady. 4,5 myń bıiktikke kóteriledi. Avtomobıl benzınimen ushady. О́te qarapaıym úlgide qurastyrylǵan», dedi joba avtory.
Elimizde jasalǵan bul ushaqty aýyl sharýashylyǵy salasynda, barlaý qyzmetinde paıdalanýǵa bolady. Syıymdylyǵy tórt adamǵa arnalǵan áýe kemesi 690 kılogramm júk kótere alady. Saǵatyna nebári 30 lıtr janarmaı jaǵady. Erekshe tehnologııalyq jetistikteri bar, kez kelgen jerge ushyp-qonýǵa qolaıly áýe kemesine qazirdiń ózinde shet memleketterden suranys túsip jatqan kórinedi.
Otandyq «Araıdy» oqý-taktıkalyq ushaq retinde paıdalaný úshin arnaıy tehnıkalyq saraptamadan ótkizgen. Ulttyq qaýipsizdik komıteti Shekara qyzmetiniń akademııasy áýe kemesin shekara kúzetinde patrýldik-baqylaý ushaǵy retinde paıdalaný úshin zertteýler júrgizgen. Sonymen qatar aýyl sharýashylyǵy salasynda da ónimniń sapasyna oń áser etýde tıimdi qyzmet atqaratyny aıtyldy.
Aıta keterligi, endigi ýaqytta elimizde qurastyrylatyn áýe kemesiniń múmkindigi artqan. Buryn tek qorǵanys salasynyń qajetine qyzmet etetin tehnıkalardy mamandar ózge de baǵyttar boıynsha tıimdi paıdalanýdy kózdep otyr. О́nertapqyshtardyń mundaı ozyq ıdeıasy memleket tarapynan qoldaý taýyp, grant bólinip, joba iske asqan. Avıasııa salasyndaǵy otandyq ǵalymdardyń jumysy tanystyrylǵan is-sharada shaǵyn avıasııany odan ári damytý máseleleri de talqylandy.
Sondaı-aq kórmege otandyq ǵalymdar qurastyrǵan ushqyshsyz ushatyn apparattar qoıyldy. Olardyń keıbiri 5 jarym saǵat ushsa, arasynda 15 myń shaqyrymǵa deıin ushatyndary da bar eken. Otandyq ónertapqyshtardyń jumystaryna qoldaý kórsetiletini de aıryqsha ataldy.
Almaty oblysy