Qazaqstan men Tájikstan arasyndaǵy ózara saýda-sattyq kólemin 2 mıllıard dollarǵa deıin arttyrý kózdelip otyr. Bul týraly Aqorda baspasóz qyzmeti habarlady, dep jazady Egemen.kz.
Memleket basshysy Qazaqstanda Tájikstanmen dostyq qarym-qatynasty joǵary baǵalaıtynyn atap ótti.
«Baýyrlas tájik halqyna qazaq jerinde aıryqsha qurmetpen qaraıdy. Otandastarymyz qazirgi Tájikstan týraly kóbirek bilip, tájik halqynyń baı mádenıetimen tereńirek tanysqysy keledi. Osy oraıda sizdiń osyndaı aýqymdy is-sharalar uıymdastyrý týraly bastamańyzdy Qazaqstan halqy men elimizdiń qonaqtary erekshe yqylaspen qabyl aldy. Bul aıtýly shara eki el arasyndaǵy dıplomatııalyq qarym-qatynastyń ornaǵanyna 30 jyl tolǵan kezeńde ótkizilýiniń erekshe sımvoldyq máni bar», dedi Prezıdent.
Memleket basshysy barlyq saladaǵy ekijaqty yntymaqtastyqtyń, sonyń ishinde sý jáne energetıka keshenindegi ózara is-árekettiń qarqyndy damyp kele jatqanyn atap ótti.
«Sý jáne energetıka salalaryndaǵy mindettemelerdi oryndaýǵa, atap aıtqanda, Qazaqstanǵa sý jáne elektr energııasyn jetkizýge baılanysty sheshimdi ýaqtyly qabyldaǵanyńyz úshin Sizge jáne barsha tájik tarapyna alǵysymyz sheksiz. Qazaqstan óz tarapynan Sizdiń aldyńǵy saparyńyz kezinde ózara kelisken barlyq mindettemeni oryndap jatyr», dep atap ótti Qasym-Jomart Toqaev.
Qasym-Jomart Toqaev Tájikstan Prezıdenti Emomalı Rahmonnyń mamyr aıynda Qazaqstanǵa sapary kezinde qol qoıylǵan Qazaqstan men Tájikstan arasyndaǵy odaqtastyq ózara is-qımyl týraly deklarasııanyń sátti júzege asyrylyp jatqanyn atap ótti.
Prezıdenttiń aıtýynsha, bıyl 6 aıda taýar aınalymy 500 mıllıon dollardan asqan. Bul rette ózara saýda-sattyq kólemin 2 mıllıard dollarǵa deıin arttyrý josparlanyp otyr.
Kelissóz barysynda Emomalı Rahmon da ekijaqty yntymaqtastyqtyń qazirgi jaǵdaıyna joǵary baǵa berdi.
«Tájikstannyń mádenıet kúnderin jáne kórmesin, sondaı-aq elimizdiń aýyl sharýashylyǵy men ónerkásip sektory ónimderiniń jármeńkesin Astana, Almaty jáne Shymkent qalalarynda ótkizýge qoldaý kórsetkenińiz úshin alǵys aıtamyn. Bul sharalardy Tájikstan men Qazaqstan arasyndaǵy qarym-qatynastyń, strategııalyq seriktestik pen odaqtastyqtyń úzdiksiz damýynyń bir belgisi dep baǵalaımyz. Bul sharalar eki el arasyndaǵy dıplomatııalyq qarym-qatynastardyń ornaǵanyna 30 jyl tolǵan kezeńde ótýiniń ózindik máni bar. Búginde elderimiz arasyndaǵy qarym-qatynastyń ózara túsinistik, joǵary qurmet pen senimge negizdelgeni qýantady. Baılanystarymyzdy odan ári nyǵaıtý Tájikstannyń syrtqy saıasatynyń negizgi basymdyǵy bolyp qala beredi», dedi Tájikstan Prezıdenti.
Áńgimelesý barysynda saýda-ekonomıka, kólik-logıstıka, aýyl sharýashylyǵy, energetıka, qarjy jáne mádenı-gýmanıtarlyq salalardaǵy ózara is-áreketti odan ári damytý perspektıvalary talqylandy.