Memleket basshysy Qasym-Jomart Toqaev jýyq arada elimizdiń bıznes ókilderimen arnaıy kezdesý ótkizetinin habarlady, dep jazady Egemen.kz.
Prezıdent Qazaqstan halqyna Joldaýy barysynda kásipkerliktiń búgingi ahýalyna da erekshe toqtalyp ótti.
«Bılik pen bıznestiń arasynda syndarly dıalog bolýy qajet. Qazirgi ótpeli kezeńde memlekettik organdardyń kemshilikke jol beretini, keıde asyra silteıtini jasyryn emes. Sondyqtan ekonomıkalyq sıpattaǵy keıbir zań buzý áreketterin qylmys sanatynan alyp tastaý jumysyn jalǵastyrý qajet. Bul jerde sóz kásipkerlerge jáne olardyń ekonomıkalyq teris áreketke qatysty ister týraly bolyp otyr», dedi Qasym-Jomart Kemeluly.
Bul rette Memleket basshysy salyq salasynda zań buzǵandardy qylmystyq jaýapkershilikke tartýǵa negiz bolatyn ádil mehanızm engizý qajet ekenin qosa aıtty.
«Quqyq qorǵaý organdarynyń kásipkerlerdi qýdalaýyn birjola toqtatý kerek. Mundaı áreketterge tyıym salynǵan. Biraq, soǵan qaramastan, áli de jalǵasyp jatqanyn bilemin. Osyndaı málimetter keıde ádeıi taratylyp jatady, tipti, olar jalǵan bolýy da múmkin. Qalaı desek te, bul – nazardan tys qaldyrýǵa bolmaıtyn másele. Kásipkerlikke qoldaý kórsetý, salany retteımiz degen jeleýmen jasalatyn qysymdy azaıtý jáne básekelestikti damytý máselelerin muqııat talqylaý qajet. Sondyqtan men jýyq arada elimizdiń bıznes ókilderimen arnaıy kezdesý ótkizemin», dedi el Prezıdenti.
Memleket basshysy Qazaqstandaǵy bankter tutyný nesıesimen áýestenip ketkenin de nazarǵa alyp, bul azamattardyń shekten tys qaryzǵa batýyna ákep soqtyrǵanyn aıtty.
«Búginde naqty sektorǵa beriletin kredıt azaıyp jatqanda bankter tutyný nesıesimen áýestenip ketti. Osy jaǵdaı qarjy júıesine tónetin syn-qaterlerdiń kóbeıýine jáne azamattardyń shekten tys qaryzǵa batýyna ákep soqtyrdy. Meniń 2019 jyly 500 myń azamattyń kepilsiz nesıesin keshirý týraly sheshimim jáne jaqynda qabyldanǵan jeke tulǵalardyń bankrottyǵy týraly zań máseleni birshama rettedi. Biraq ahýaldy birjola túzeý úshin jańadan júıeli sharalar qabyldaý qajet», dep túsindirdi Qasym-Jomart Toqaev.
Sóz barysynda Prezıdent Qazaqstan azamattarynyń qarjy saýatyn arttyrý óte mańyzdy ekenin eske saldy.
«Bul rette «Amanat» partııasynyń «Qaryzsyz qoǵam» jobasyn erekshe atap ótý qajet. Sonyń arqasynda elimizdiń 8 aımaǵynda 20 myńnan astam adam qarjylyq saýatyn arttyrdy. Olardyń kópshiligi – 10 jáne odan da kóp nesıe alǵan adamdar. Bul joba az ýaqytta óziniń tıimdiligin kórsetti. Úkimetke «Amanat» partııasymen birlesip, onyń aýqymyn keńeıtýdi tapsyramyn. «Qaryzsyz qoǵam» jobasynyń ıgiligin búkil elimiz kórýi qajet», dep túıindedi Memleket basshysy.