Qazaqsha bilý – qajettilik

– Ákem – orys, sheshem – tatar. Tatarǵa kúıeýge shyqtym. Otba­sy­myzdy shaǵyn Assambleıa dese de bolady. Áke-sheshem mektepte mu­ǵalim bolyp jumys is­teıdi. Pavlo­dar qalasynda orys mektebinde bilim aldym. 9-synyptan keıin oblys or­ta­lyǵyndaǵy memlekettik ýnı­ver­sıtettiń janyndaǵy lıseıge oqýǵa tústim. Qazaq tiline degen qy­zyǵýshylyǵym da osy kezden bas­taldy. Buǵan deıin barlyq oqýshy sekildi qazaq tilin sabaq deń­geıinde ǵana meńgerdik. 9-synyptan keıin tereńdete oqýǵa den qoıdym. Olımpıadalarǵa qatysa bastadym. Otbasymyzda oryssha jáne tatarsha sóıleıtinbiz. Al tatar tili qazaq tiline uqsaıdy. Sondyqtan da qazaq tilin erkin meńgerý qıyn bolǵan joq. Onyń ústine ákem qazaqsha kitap oqýym­dy, teledıdardan qazaqsha baǵdarlamalar kórýimdi tapsyratyn, qadaǵalaıtyn. Osylaısha, ákemniń qoldaýymen memlekettik tilde erkin sóıleıtin deńgeıge jettim. Meniń Otanym – Qazaq­stan. Mundaǵy negizgi halyq – qazaqtar. Sondyqtan qazaq tilin bilýge mindettimin. О́zińdi osy eldiń naǵyz azamaty retinde sezingiń kelse, qazaqsha úırenýiń kerek. Sonda ǵana osynda turatyn adamdardyń jan-dúnıesine úńile alasyń, – deıdi Elına.

12 jasynan bastap Qazaqstan halqy Assambleıasynyń jumy­syna aralasyp, «Assambleıanyń balasy» atanyp ketken Elına qoǵamdyq hám memlekettik qyz­metterde qazaq tilin nasıhattaýǵa den qoıady. Qazir respýblıkalyq «Qoǵamdyq kelisim» memlekettik mekemesiniń dırektory retinde de qazaq tiliniń damýyna qal-qaderinshe úles qosyp keledi.

– Pavlodarda júrgende ózge ult jastary arasynda qazaqsha sóıleý klýbtaryn ashtyq. Bul bastamamyz óz jemisin berdi. Qazirgi jumysym tikeleı osy salamen baılanysty desem de bolady. «Qoǵamdyq keli­sim» mekemesi birneshe joba arqyly memlekettik tildi nasıhattap keledi. Máselen, jastarǵa arnalǵan «Birlik» lageri, «Bir el» ekspedısııasy, «Úıde sóı­le» jobasy arqyly qazaq tilin nasıhattap júrmiz. Jalpy, árbir otbasy úıinde qazaqsha sóıleýge tıis. Osyndaı úrdis qalyptasýy kerek. Ata-analar ul-qyzdarynyń bolashaǵyn oılasa, osyǵan myqtap kóńil bólgeni abzal. О́ıtkeni qazaq tili ómirlik qajettilikke aınaldy. Osyny esten shyǵarmaý kerek. Qazaqsha qate sóılep, uıatqa qalamyn dep qysylmaǵan durys. Memlekettik qyzmetke jumysqa turarda qazaq tilin qanshalyqty meńgergenin bilý úshin test tapsyrady. Mun­daı talapty kúsheıtý kerek. Dál osy jaǵdaı ózgelerdiń qazaq tilin meńgerýine yqpal etedi dep oılaımyn, – deıdi Elına Sergeevna.

Bertinge deıin bir aýyz qazaqsha biletin ózge ult ókilin kórsek, elpildep qalatyn edik. Keıingi ýaqytta buǵan da kóz úırenip, tań­danbaıtyn boldyq. Solaı bolýy da kerek. О́ıtkeni olar óz Otanynyń tilinde sóıleıdi.