Qos tarap saýda-ekonomıkalyq, kóliktik-logıstıkalyq, ınvestısııalyq jáne gýmanıtarlyq yntymaqtastyqty nyǵaıtýǵa basa mán bere otyryp, Qazaqstan men Albanııa arasyndaǵy seriktestiktiń negizgi máselelerin talqylady, dep jazady Egemen.kz Aqorda baspasóz qyzmetine silteme jasap.
Qasym-Jomart Toqaev eki eldiń qarym-qatynasyn odan ári nyǵaıtý úshin zor múmkindik pen áleýet bar ekenine nazar aýdardy.
«Biz Albanııany Balqan túbegindegi óte mańyzdy seriktes el retinde qarastyramyz. Bul kezdesý – ózara tıimdi yntymaqtastyǵymyzdy nyǵaıtý úshin naqty nátıjege qol jetkizý turǵysynan alǵanda sheshýshi sát. Qazaqstan men Albanııany kóptegen ortaq dúnıe baılanystyrady. Bizdiń elderimizde kóptegen ult pen din ókilderi meken etedi. Sonymen qatar eki el halqynyń da basym kópshiligi – musylmandar. BUU, EQYU jáne IYU sekildi iri halyqaralyq uıymdar aıasyndaǵy yntymaqtastyǵymyz ben baılanystarymyzdy nyǵaıtý qajet», dedi Memleket basshysy.
Prezıdent Astana men Tırana arasynda tikeleı áýe qatynastaryn ornatý qajet ekenin aıtty.
«Týrızm, kólik, energetıka jáne basqa da salalardaǵy múmkindikter týraly aıta kele, astanalarymyz arasynda tikeleı áýe qatynasyn ashý múmkindigin qarastyrý qajet. Qazaqstan ózara yntymaqtastyqty damytýǵa nıetti ekenin taǵy da atap ótkim keledi. Biz naqty nátıjelerge qol jetkizý úshin qoldan kelgenniń bárin jasaımyz», dedi Qasym-Jomart Toqaev.
Jıyn barysynda Baıram Begaı ekijaqty yntymaqtastyqtyń qazirgi jaı-kúıin joǵary baǵalady.
«Bizdiń alǵashqy kezdesýimiz eki el arasynda syndarly dıalog bastalǵanyn kórsetedi. Albanııa men Qazaqstan arasyndaǵy qarym-qatynasty keńeıtý, sondaı-aq yntymaqtastyǵymyz ben gýmanıtarlyq baılanystarymyzdy nyǵaıtý jónindegi ortaq maqsatqa saı is-áreketterimiz jalǵasady dep úmittenemin. Sonymen qatar ekonomıkalyq yntymaqtastyqty nyǵaıtý úshin áleýetimiz mol. Biz osy múmkindikti paıdalana alamyz. Taý-ken, energetıka, aýyl sharýashylyǵy, týrızm jáne ınfraqurylymdyq damý salalaryndaǵy ózara yntymaqtastyǵymyzdy nyǵaıtqymyz keledi», dedi Albanııa Prezıdenti.