Astana qalasy ákiminiń orynbasary Eset Baıken elordanyń bilim berý uıymdarynyń jańa oqý jylyna daıyndyǵy týraly brıfıng ótkizdi, dep habarlaıdy Egemen.kz.
Brıfıngke Astana qalasynyń Bilim basqarmasynyń basshysy Qasymhan Senǵazyuly qatysty.
Eset Berikulynyń aıtýynsha, Astanada jańa oqý jylynda 1 synypqa 27 myń bala barǵan. Qaladaǵy balalardyń jalpy sany - 259 myń. 169 mektep bilim beredi, onyń ishinde 101 - memlekettik, 61 - jekemenshik, 7 - respýblıkalyq mektep. Aıta ketsek, byltyrǵy jylmen salystyrǵanda bala sany 22 myńǵa artqan.
«Búginde elordada 169 mektep jumys isteıdi (onyń ishinde 101 memlekettik, 61 jekemenshik, 7 respýblıkalyq mektep). Qala turǵyndarynyń jyl saıyn ósýi oqýshy sanynyń ósýine de ákeledi. Osy oraıda áleýmettik nysandardyń da qurylysy basty nazarda. Qazirgi ýaqytta qalada 14 mekteptiń qurylysy júrip jatyr, onyń ishinde 11 mektep osy oqý jylynda paıdalanýǵa beriledi.
Oqý jylynyń basynda 4 mektep (1 mektep, 1 mekteptiń janynan salynǵan jańa korpýs, 2 jekemenshik mektep) paıdalanýǵa berildi», dedi spıker.
Bıyl eki aýysymda 2400 oqýshy ornyna arnalǵan №96 mektep-gımnazııasynyń paıdalanýǵa berilýi №85 mektep-lıseıiniń úshaýysymdyq máselesin sheshti.
Mektep qurylysyna jeke ınvestısııa da tartylyp jatyr. Atap aıtqanda, «Spectrum» jáne «Riviera International» halyqaralyq mektebi jańa oqý jylynda paıdalanýǵa berilgen.
«Qaladaǵy úshaýysymdyq mektep máselesi Memleket basshysynyń tapsyrmasy boıynsha «Jaıly mektep» ulttyq jobasy aıasynda 90 myńdaı oqýshyǵa arnalǵan (2 aýysymda) 24 mekteptiń qurylysy aıaqtalǵannan keıin sheshiledi», dedi qala ákiminiń orynbasary.
Mektepke deıingi bilim berý uıymdary týraly aıta ketsek, qazirgi ýaqytta Astana qalasynda 67 642 balany qamtıtyn 505 mektepke deıingi uıym jumys isteıdi. (100 memlekettik, 402 jekemenshik, 3 vedomstvolyq).
«Aǵymdaǵy kezeńde INDIGO elektrondy portalynda mektepke deıingi jastaǵy 60 971 bala tirkelgen, onyń ishinde 2 men 6 jas aralyǵyndaǵy 41 818 bala. Bıyl balabaqshalarda jalpy sany 10 317 orynǵa qosymsha memlekettik tapsyrys ornalastyryldy. Onyń 9157–i qańtar-sáýir aıynda ornalastyryldy, qalǵan 1360 oryn osy qyrkúıek aıynda ornalastyrylyp, qujattar qabyldanyp jatyr. Barlyǵy INDIGO saıty arqyly júzege asyrylatynyn jaqsy bilesizder», dedi Eset Baıken.
Onyń aıtýynsha, jańa balabaqshalardy ashý máselesi boıynsha ústimizdegi jyly mektepke deıingi uıymdar janynan 500 orynǵa turǵyn úı keshenderiniń birinshi qabattarynan qosymsha ǵımarattardy ashý josparlanyp otyr.
Memleket basshysynyń tapsyrmasyn oryndaý aıasynda osal toptaǵy otbasylardyń balalaryn balabaqshamen qamtamasyz etý máselesi qaıta qaralyp, qyrkúıekten bastap Astana qalasy ákimdigi «Qaladaǵy mektepke deıingi bilim berý uıymdary tárbıelenýshileriniń jekelegen sanattaryn tegin tamaqtandyrýdy uıymdastyrý týraly» qaýlysyn qabyldaǵan. Demek, atalǵan qaýlyǵa sáıkes halyqtyń áleýmettik osal tobyndaǵy balalar balabaqshaǵa tegin barady. Iаǵnı osy ýaqytqa deıin ata-ana balabaqshaǵa tek tamaqtaný aqysyn tólep kelse, endi ol memleket esebinen júrgiziletin bolady. Ata-ana tek balasy qosymsha úıirmelerge baratyn bolsa ǵana kelisim-shart negizinde aqy tóleıdi.
Búgingi tańda elordada 32 kolledj bar. (9 - memlekettik, 23 - jekemenshik). Kadrlardy daıarlaý 75 mamandyq jáne 122 biliktilik boıynsha júzege asyrylady.
Búginde barlyq kolledjderde kabınetterge, sheberhanalar men jataqhanalarǵa aǵymdaǵy jóndeý jumystary júrgizilip, bilim berý baǵdarlamalary ózektendirilgen, pedagogıkalyq shtat jasaqtalǵan. Búgingi tańda 18 jataqhanaǵa 2696 stýdent ornalastyryldy.
«Bıyl «Barshaǵa arnalǵan tegin kásiptik tehnıkalyq bilim berý» jobasy sheńberinde 8500 grant ornalastyryldy. О́tken jylmen salystyrǵanda 1200 orynǵa kóbeıdi», dedi spıker.
Osy oqý jylynda alǵash ret pılottyq joba sheńberinde qalanyń 170, 10-11 synyp oqýshylaryna arnalǵan eksperımenttik bilim berý baǵdarlamalary boıynsha qabyldaý júzege asyryldy. Atalǵan eksperıment boıynsha oqýshylar 1,5 jyldan keıin bilim týraly attestaty men jumysshy mamandyǵy boıynsha dıplomdy qosa alyp shyǵady.
Sondaı-aq onlaın-brıfıngte qoıylǵan suraqtarǵa qala ákiminiń orynbasary men bilim berý basqarmasynyń basshysy tushymdy jaýaptaryn berdi.