Memleket basshysy Qasym-Jomart Toqaev Polshada ótken komandalyq álem chempıonatynda kúmis medalǵa ıe bolǵan shahmattan Qazaqstannyń áıelder quramasyn quttyqtady, dep habarlaıdy Egemen.kz Aqordanyń baspasóz qyzmetine silteme jasap.
«Shahmattan Qazaqstan quramasyn áıelder arasyndaǵy komandalyq álem chempıonatynda tuńǵysh ret kúmis medalǵa ıe bolýymen quttyqtaımyn! Bul – elimizdiń shahmat tarıhyndaǵy aıtýly oqıǵa. Baıraqty básekede qyzdarymyz asqan sheberliktiń jáne jeńiske degen sheksiz erik-jigerdiń ozyq úlgisin kórsetti. Sizderdiń tamasha jetistikterińiz shahmat sportyn jan-jaqty dáriptep, óskeleń urpaqtyń oǵan degen qyzyǵýshylyǵyn arttyra túsetini anyq.
Memleket adamnyń oı-órisin jetildiretin bekzat ónerdi damytýǵa barynsha qoldaý kórsete beredi. Elimizdegi kásibı jáne áýesqoı shahmatshylarǵa tek jarqyn jeńister tileımin!», dep jazdy Prezıdent óziniń Instagram paraqshasynda.
Aıta keteıik, buǵan deıin Polshada ótken shahmattan komandalyq álem chempıonatynda elimizdiń qyzdar quramasy kúmis júlde ıelengenin habarlaǵan edik.