QR Ǵylym jáne joǵary bilim mınıstri Saıasat Nurbek óziniń Telegram arnasynda 2024 jylǵy ulttyq biryńǵaı testileýine engiziletin ózgerister týraly jazdy, dep habarlaıdy Egemen.kz.
«Búgin sizdermen 2024 jylǵy UBT jańalyqtaryn bóliskim keledi. Byltyr ýáde bergenimizdeı, emtıhannyń formatyndaǵy barlyq ózgeris jańa oqý jylynyń basynda jarııa etiledi. Bul bolashaq talapkerlerge joǵary oqý ornyna túsýge jaqsy daıyndalýǵa kómektesedi.
Joǵary bilimdi ońtaıly etýdiń mańyzdy qadamy – UBT tapsyrmalaryn jetildirý. Biz nátıjelerdi qalyptastyrý men taldaýda psıhometrııalyq tásilderdi qoldana otyryp, standarttalǵan formatqa kóshemiz. Bul ózgerister Qazaqstan Respýblıkasynyń 2023-2029 jyldarǵa arnalǵan joǵary bilim men ǵylymdy damytý tujyrymdamasyna sáıkes keledi», dep jazdy Saıasat Nurbek.
Onyń jazýynsha, 2024 jylǵy UBT-da test suraqtarynyń sany ózgeredi, sondaı-aq beıindik pánderge jańasha tapsyrmalar qosylyp, testileý ýaqyty qysqarady.
«️UBT-daǵy pánderdiń sany ózgerissiz qalady, ıaǵnı úsheýi mindetti jáne ekeýi tańdaý boıynsha. Alaıda, «Oqý saýattylyǵy» men «Matematıkalyq saýattylyq» mindetti pánderinen tapsyrmalar sany 5 suraqqa qysqarady. Al beıindik pánderdiń suraqtar sany artyp, 40 test tapsyrmasynan turatyn bolady. Atap óteıin, beıindik pánderde berilgen tizimnen sáıkestikti anyqtaýǵa arnalǵan 5 tapsyrma qosylady. Bul ózgerister – test tapsyrmalarynyń sapasyn arttyrý men olardyń fýnksıonaldyq saýattylyq pen synı oılaý daǵdylaryn baǵalaýdyń álemdik standarttaryna sáıkestigi baǵytyndaǵy jumystardyń qısyndy jalǵasy», dep túsindirdi mınıstr.
Osylaısha, UBT tapsyrmalarynyń sany ózgerissiz qalady, jalpy 120 suraq. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrma. Joǵary ball – 140, ol da ózgerissiz qaldy.
«Joǵaryda atalǵan ózgeristerge baılanysty testileý ýaqyty qysqarady. Endi UBT tapsyrýǵa oqýshylarǵa 3 saǵat 30 mınýt (210 mınýt) bólinedi. Buryn 4 saǵat (240 mınýt) berilgen. Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek», dedi S.Nurbek.
Sondaı-aq UBT-ǵa engiziletin taǵy bir jańalyq shyǵarmashylyq baǵyttardy tańdaǵan talapkerlerge qatysty, endi olar «Qazaqstan tarıhy» men «Oqý saýattylyǵy» pánderimen qatar «Matematıkalyq saýattylyqty» mindetti pán retinde tapsyrady. «Matematıkalyq saýattylyqtan» test tapsyrmalary talapkerlerdiń ómirde matematıkalyq logıka boıynsha alǵan bilimderin, daǵdylaryn qoldana alýyn tekserýge baǵyttalady.
«Beıindik pánderdiń kombınasııasy boıynsha da ózgerister bar. Oqýshylardyń, ata-analardyń jáne pedagogıkalyq qaýymnyń pikirleri men usynystaryn eskere otyryp, «B059 – Kommýnıkasııalar jáne kommýnıkasııalyq tehnologııalar», «B055 – Matematıka jáne statıstıka», «B063 – Elektrotehnıka jáne avtomattandyrý» bilim berý baǵdarlamalarynyń toptaryna túsýshiler «Matematıka-Informatıka» kombınasııasyn tapsyrady.
Qorytyndylaı kele, ótken jyly QR Ǵylym jáne joǵary bilim mınıstrligi negizgi UBT-ny eki ret tapsyryp, úzdik nátıjemen grant taǵaıyndaý konkýrsyna qatysý múmkindigin resmı túrde bekitkenin eske salǵym keledi. Eger aqyly negizde túsý úshin UBT tapsyrýdyń taǵy úsh múmkindigi bar ekenin eskeretin bolsaq, onda 2024 jylǵy talapkerler testileýden bes ret óte alady», dep qorytyndylady mınıstr.