Jetisý derbes oblys bolǵannan keıin Memleket basshysy Qasym-Jomart Toqaev óńirge ınvestor tartýdy tapsyrǵan edi. Qazir oblysta osy baǵytta aýqymdy jumystar júrgizilip jatyr. Máselen, kúni keshe ızraıldik kompanııa Jetisýda kún elektr stansasyn salýǵa nıet bildirdi.
Memleket basshysy 2025 jylǵa qaraı negizgi kapıtalǵa salynǵan ınvestısııalar deńgeıin IJО́-niń 25 paıyzyna deıin arttyrý mindetin qoıdy. Bul jyl saıyn ósim 10 paıyzdan joǵary bolýy kerek degendi bildiredi.
«Árıne, basqa elder de qarap otyrǵan joq, olar da alǵa qaraı umtylyp, damyp keledi. Bir sózben aıtqanda, jahandyq ekonomıka jáne halyqaralyq eńbek naryǵy túbegeıli ózgerip jatyr. Tehnologııalyq báseke qyzyp tur. Barlyq jerde resýrstar úshin talas júrip jatyr. Klımattyń ózgerýi, azyq-túlik qaýipsizdigi jáne demografııalyq turǵydan ornyqty damý eń ózekti máselege aınaldy. Bir sózben aıtqanda, adamzat tarıhynda buryn-sońdy bolmaǵan syn-qaterler men túbegeıli ózgerister dáýiri bastaldy», degen edi Prezıdent. Osy maqsatta oblys ákiminiń orynbasary Áset Qanaǵatov «El-Mor electric installation & Services (1986) Ltd» kompanııasynyń prezıdenti Gershon Gaı myrza bastaǵan kompanııa ókilderimen irgeli jobaǵa qatysty máselelerdi talqylady.
О́ńir ákimi baspasóz qyzmetiniń málimetinshe, sheteldik kompanııa Jetisý jerinde qýaty 500 MVt bolatyn kún elektr stansasynyń qurylysy jobasyn júzege asyrýǵa nıet bildirgen. Aldymen óńirdiń ınvestısııalyq múmkindikterine qysqasha toqtalyp, Jetisý óńiriniń «jasyl» energııany damytýdaǵy áleýetiniń mol ekenin atap ótken Á.Qanaǵatov sheteldik kompanııanyń usynyp otyrǵan ınvestısııalyq jobasyna jergilikti ákimdik barynsha qoldaý kórsetetinin aıtty.
Izraıldik kompanııa jańartylǵan energııa kózderi salasynda qýaty 500 MVt bolatyn «Jetisý oblysy aýmaǵyndaǵy kún fotoelektrlik elektr stansasy kesheniniń qurylysy» jobasyn otandyq «Sunstar Energy» JShS-men birlesip qolǵa alýǵa ynta bildirip otyr. Kompanııanyń ınvestısııalar jónindegi dırektory Davıd Golodtyń aıtýynsha, jobaǵa shamamen 400 mln dollar kóleminde ınvestısııa salynady.
Á.Qanaǵatovtyń aıtýynsha, aldaǵy ýaqytta qurylysqa qajetti jer ýchaskesi aıqyndalady. Jáne jumys toby qurylyp, jobany iske asyrýdyń naqty sharalary men merzimderi belgilenedi.
Kezdesý sońynda oblys ákimdigi, «El-Mor electric installation & Services (1986) Ltd» kompanııasy jáne «Sunstar Energy» JShS arasynda atalǵan jobany júzege asyrý nıeti týraly úsh jaqty memorandýmǵa qol qoıyldy.
Jyl sońyna deıin aýyl sharýashylyǵy óniminiń kólemi 2,8 paıyzǵa ósip, 544 mlrd teńgege jetedi dep josparlanǵan. Osy salany budan ári damytý úshin 2027 jylǵa deıin quny 57,9 mlrd teńge bolatyn 53 ınvestısııalyq jobany iske asyrý kózdelip otyr. 1,2 myń jańa jumys orny ashylady. Onyń ishinde «Iri jobalar» qanatqaqty jobasy aıasynda 44,8 mlrd teńgege 18 joba kózdelse, bıyl 400 basqa arnalǵan, 2 mlrd teńgelik taýarly sút fermasy salyna bastaıdy.
Jalpy, óńirde barlyq salada ınvestısııa tartý jumystary júıeli júrip jatyr. 2026 jylǵa deıingi ınvestısııalyq portfelge quny 1,6 trln teńge bolatyn 7,1 myń jumys orny qurylatyn 146 joba qalyptastyryldy. Oblys qurylǵannan beri jalpy quny 38 mlrd teńgelik 1 myńnan asa jumys orny bar 47 joba iske asyryldy. Sonyń ishinde jyl basynan beri quny 1,7 mlrd teńgelik 68 jumys orny bar 8 joba qolǵa alyndy.
Jetisý oblysy