Májilis spıkeri Erlan Qoshanovtyń tóraǵalyǵymen Bıýro otyrysy ótip, aldaǵy jalpy otyrystyń kún tártibi naqtylandy.
Jalpy otyrysta depýtattarǵa aqparattyq qaýipsizdik máseleleri týraly zań jobasyn talqylaý usynylady. Zań jobasy Májilis depýtattarynyń bastamasymen ázirlengen. Qujat derbes derekter jáne olardy qorǵaý týraly zańnamanyń saqtalýyna memlekettik baqylaýdy engizýge, «derbes derekterdiń qaýipsizdigin buzý» uǵymyn anyqtaýǵa jáne jeke basyn kýálandyratyn qujattardyń qaǵaz kóshirmelerin jınaýǵa jáne óńdeýge tyıym salýdy belgileýge baǵyttalǵan. Zań jobasy 12 zańnamalyq aktige ózgerister men tolyqtyrýlar engizýdi kózdeıdi.
Depýtattar aldaǵy jalpy otyrysta Qazaqstan men Kıpr arasyndaǵy ustap berý týraly shartty ratıfıkasııalaý týraly zań jobasyn qaraıdy. Sonymen qatar Bıýro otyrysynda «Halyqtyń shamadan tys kredıt alýyn azaıtý jáne qarjylyq saýattylyqty arttyrý týraly» máselesi boıynsha parlamenttik tyńdaý ótkizý jóninde másele qaraldy.