Senat depýtattary Ekonomıkalyq saıasat, ınnovasııalyq damý jáne kásipkerlik komıtetiniń kóshpeli otyrysyn Mańǵystaý oblysynda ótkizip, shaǵyn jáne orta kásipkerlikti damytý máselesin talqylady, dep habarlaıdy Egemen.kz joǵarǵy palatanyń baspasóz qyzmetine silteme jasap.
Komıtet tóraǵasy Súıindik Aldashev jetekshilik etken kóshpeli otyrysta Prezıdenttiń «Ádiletti Qazaqstannyń ekonomıkalyq baǵdary» Qazaqstan halqyna Joldaýyn iske asyrý aıasynda atqarylar sharýa aıtyldy. Memleket kásipkerlerge ekonomıkaǵa ınvestısııa salýǵa, salyqtardy adal tóleýge, jumys oryndaryn ashýǵa múmkindik beretin bıznesti damytý úshin neǵurlym qolaıly jaǵdaı jasaýdy kózdeıtini eskertildi. Komıtet músheleri mańǵystaýlyq kásipkerlerge osy jyldyń qarasha aıynda shaǵyn jáne orta kásipkerlikti damytý taqyrybynda úkimettik saǵat ótkizýdi josparlaǵanyn jetkizdi.
«Búgin otyrysta ortalyq jáne jergilikti atqarýshy organdarmen birlese otyryp Mańǵystaý oblysyndaǵy shaǵyn jáne orta bıznestiń júıeli máseleleri qaraldy. О́z kezeginde, bıznes ókilderi tarapynan naqty máseleler men usynystar aıtylady. Olardy komıtettiń budan bylaıǵy zańnamalyq jumysynda qarastyrý jáne eskerý qajet dep sanaımyn. Qajet bolǵan jaǵdaıda ortalyq memlekettik organdarmen birlesip zańnamaǵa tıisti túzetýler daıyndaý qajet», dedi S.Aldashev.
«Atameken» óńirlik kásipkerler palatasynyń ókili senatorlarǵa óńirdegi ahýaldy baıandady. Mańǵystaý oblysy 7 aıdyń qorytyndysy boıynsha sýbsıdııalaý boıynsha qoldaý alǵan jobalar boıynsha 1 oryndy (560 joba) jáne kredıtteý somasy boıynsha 5 oryndy (23 mlrd teńge) ıelengeni aıtyldy. Senat depýtattary «Aqtaý teńiz porty» AEA, Aqtaý teńiz soltústik termınaly, «Sarja» kólik-logıstıkalyq ortalyǵy, Quryq porty jáne óńirdiń basqa da birqatar nysanyn aralady.