Álemdi úılestiretin qýatty kúsh – óner qudireti. Sebebi óner men shyǵarmashylyqtyń adamzatqa ortaq jalǵyz tili bar. Almatydaǵy Memlekettik ortalyq mýzeıde koreı jáne qazaq sýretshilerin bir alańǵa jınaǵan «Jer planetasyna taǵzym» atty sýret kórmesiniń kýási bolyp qaıttyq.
Jer betindegi mamyrajaı tirlikke ómirdiń túrli baǵytyna jaýapty – adam. Atyspaı-shabyspaı, talaspaı-tartyspaı jer besikti jumaq baqqa aınaldyrýǵa jumyr basty pendelerge ne kedergi? Kórmedegi qazdaı tizilgen kartınalar osy bir saýaldyń jaýabyn izdeýge shaqyratyndaı... Adam qolymen jasalatyn apattar, qııanattar men qastandyqtar qylqalam ustaǵan sheberlerdiń kenebinde ótkir synǵa ushyraıdy. Sezim yrǵaqtaryn tap basatyn týyndylar kóńil tazalyǵyn, meıirim men izgilikti eshbir amal almastyra almaıtynyn alǵa tartady.
T.Júrgenov atyndaǵy Qazaq ulttyq óner akademııasy men Tedjondaǵy halyqaralyq óner almasý qaýymdastyǵy birlese uıymdastyrǵan kórmege keskindeme, músin, grafıka jáne aralas tehnıkada oryndalǵan týyndylar qoıylǵan. Sýretshilerdiń baǵyttary men stılderi jalpy zamanaýı óner tili arqyly álem halyqtarynyń mádenı dástúrleri men ulttyq qundylyqtaryn dáripteýge shaqyrady.
Memlekettik ortalyq mýzeı dırektory Rashıda Harıpova mádenıetter dostyǵy álem elderin bir arnada toǵystyratyn aıryqsha qundylyq ekenin, tek elimizdiń ǵana emes qanshama ult pen ulystyń ómir órneginen habar beretin qundy jádigerler saqtalǵan mýzeıde mundaı sharalar úzbeı ótip turatynyn aıtady. Bul óz kezeginde elimizdiń halyqaralyq qaýymdastyq aldyndaǵy bedelin bıiktetetin jobalar sanatynda.
«Kórmeniń negizgi maqsaty – halyqtar arasyndaǵy ózara mádenı baılanys pen yntymaqtastyqty qoldaý jáne nyǵaıtý. Beıbitshilik pen turaqtylyqty, tabıǵat pen qorshaǵan ortanyń sulýlyǵyn nasıhattaý jáne álemdegi tabıǵı apattar men adamnyń tikeleı is-áreketinen bolǵan ekologııalyq apattarǵa nazar aýdarý. Bul kórmege otandyq jáne sheteldik tanymal sýretshiler qatysýda. Qazaqstannyń eńbek sińirgen qaıratkerleri – Amandos Aqanaev, Jumaqyn Qaırambaev, Álibaı Bapanov, Bolat Turǵynbaı, Baýyrjan Baıdilda, Nellı Býbe, О́mirbek Jubanııazovtardyń qoltańbalaryna shetelden kelgen ónertanýshylar tańǵalysyn bildirýde», deıdi Rashıda Erimqyzy.
Sýretshiler óz ıdeıalaryn qarapaıym adamdardyń ómir tynysy arqyly jetkizedi. Sol arqyly adam men tabıǵat úndestigin, aq pen qaranyń qaıshylyǵyn pishindik bederler men kópqabatty boıaý tústerin paıdalaný arqyly sóıletedi. Kórmege qatysqan koreı sýretshileriniń ishinde elimizdiń óner salasynyń damýyna aıshyqty úles qosyp, mazmundy kelbet bergen talanttar az emes.
– Búginde eki el arasyndaǵy mádenı, shyǵarmashylyq baılanys qarqyndy damýda. Akademııa ustazdary men magıstranttary birneshe ret Tedjon qalasynda ótken halyqaralyq kórmelerge qatysyp, koreıalyq sýretshiler óner akademııasynda kórme ótkizip, ózara tájirıbe almasyp keledi. «Jer planetasyna taǵzym» atty kórme beıneleý óneri salasyndaǵy jańa zamanaýı baǵyttaǵy óner týyndylarylarymen óz kórermenderin tabady dep senemiz, – deıdi T.Júrgenov atyndaǵy Qazaq ulttyq óner akademııasynyń ustazy, sýretshi Jumaqyn Qaırambaev.
Atap óter bolsaq, dástúrli kórme bıyl 15-ret shymyldyǵyn túrip otyr.
ALMATY