Qaırat Rysqulbekov atyndaǵy ortalyq saıabaqta «Taraz – tarıh tolqynynda» atty respýblıkalyq fototilshiler baıqaýynyń marapattaý rásimi ótti. Qala kúni merekesine oraı uıymdastyrylǵan baıqaýǵa elimizdiń ár qıyrynda turatyn belgili fototilshiler qatysty.
Respýblıkalyq deńgeıde uıymdastyrylǵan is-sharaǵa qatysqan áriptesterdiń eńbeginen kóne shahardyń búgingi kelbetin, tarıhı oryndaryn sheberlikpen obektıvke syıdyrǵanyn baıqadyq. 12 qatysýshynyń barlyǵy da kórkeıgen, jańarǵan shahardy jan-jaqty kórsetý úshin aıanyp qalmaǵan.
«Taraz – tarıhymyzdyń temirqazyǵy. Este joq eski zamannan syr shertken kóne shahar tarıhy, baıyrǵy mádenıeti men táýelsizdik jyldary qaıta kórkeıgen kelbetin qatysýshylar barynsha jaqsy kórsetken.
Baıqaýdyń basty maqsaty – eki myń jyldan astam tarıhy bar súıikti qalamyzdyń búgingi beınesin foto óneri arqyly kópshilikke tanytý. Sondaı-aq osy arqyly kásibı mamandardy anyqtap, olardyń eńbegin halyq arasynda keńinen dáriptegendi jón dep uıǵardyq», dedi is-shara qorytyndysynda sóz sóılegen Taraz qalasynyń ákimi Baqytjan Orynbekov.
О́z isiniń sheberleri synǵa túsken baıqaý qorytyndysynda túrkistandyq Naqyp Shyntemirov júldeli úshinshi oryndy ıelense, shymkenttik Samat Myrzalıevke ekinshi oryn buıyrdy. Qazylar alqasy almatylyq Ernur Manaphanulynyń eńbegin joǵary baǵalap, birinshi orynǵa laıyq dep tapty.
Budan bólek baıqaýda baq synaǵan qatysýshylar arnaıy atalym boıynsha marapattaldy. Máselen, «Úzdik fotograf» atalymy syılyǵyn shymkenttik Maqsat Shaǵyrbaı ıelense, «Úzdik qala peızajy» atalymy tarazdyq Dáýren Nysanbaevqa, «Eń ádemi kórinis» atalymy taǵy bir tarazdyq qatysýshy Tabyn Ábildaǵa, «Móldir tabıǵat» atalymy túrkisandyq Serikbolsyn Sherige, «Qas-qaǵym sát» atalymy almatylyq Ákpar Úrkinbaıulyna buıyrdy. Sondaı-aq jergilikti fototilshiler Aqádil Rysmahan, Iýrıı Kım, Mıhaıl Te, almatylyq Dosjan Balabekuly yntalandyrý syılyǵyna ıe boldy.
Taraz