Túrkistan oblysy ákiminiń baspasóz qyzmeti málim etkendeı, atalǵan oblys ortalyǵynda kúsh atasy Qajymuqan Muńaıtpasovty eske alýǵa arnalǵan eresekter arasynda qazaq kúresinen Azııa kýbogi dodasy bastaldy. Baıraqty básekege Qazaqstan, Mońǵolııa, Qytaı, Úndistan, О́zbekstan, Qyrǵyzstan, Tájikstan jáne Túrkistan oblysy komandalary qatysyp jatyr, dep jazady Egemen.kz.
Dúbirli dodanyń ashylý rásiminde oblys ákiminiń orynbasary Beısen Tájibaev, «Qazaq kuresi» assosıasııasynyń bas dırektory Erlan Estek, oblystyq máslıhat tóraǵasy Nuraly Ábishev jarysqa qatysýshylardy quttyqtady.
«Osy kúnderi álemdegi 40-tan asa elde ulttyq kúresimizden federasııalar qurylyp, jumystar atqaryp jatyr. О́zderińizge belgili, qazaq kúresinen Álem, Azııa, Afrıka jáne Eýropa chempıonattary ótkizilip, damýdyń jańa deńgeıine kóterildi. Atalǵan is-sharalar buqaralyq sporttyń damýyna ózindik zor úles qosyp otyr. Azııa kýbogynyń uıymdastyrýshylary men qatysýshylaryna jáne tóreshiler quramyna oblys halqynyń atynan alǵysymdy bildiremin», dedi Beısen Tájibaev.
Birinshi kúni bes túrli salmaqtardyń beldesýleri bolyp, ekinshi kúni úsh túrli salmaqtarmen qatar «Túıe balýan» jeńimpazy anyqtalady. Jalpy 8 salmaq dárejesi boıynsha barlyǵy 150 balýan boz kilem kórkin qyzdyrady.
Birinshi orynǵa 200 myń, ekinshi orynǵa 100 myń, úshinshi orynǵa 50 myń teńge aqshalaı syıaqy beriledi. Al «Túıe balýanǵa» temir tulpardyń kilti tabystalady.